Франак Вячорка расказаў, як званок Вавана і Лексуса выглядаў з ягонага боку і як адно слова выдала пранкераў
Па словах дарадцы Ціханоўскай, хлусня выкрылася адразу, калі падстаўны «Парашэнка» пачаў гаварыць. Але чаму тады яны працягнулі размову?
На інтэрв'ю да кіраўніка АНТ Марата Маркава прыйшлі пранкеры Ваван і Лексус, якіх звязваюць з расійскімі спецслужбамі. Яны паказалі відэа розыгрышу Святланы Ціханоўскай. Праўда, у пранку, які прапаганда выстаўляе як сенсацыйныя прызнанні, прагучалі толькі тэзісы, якія Ціханоўская і так агучвае публічна.
Але як увогуле адбылася размова з гэтым «Парашэнкам»?
Франак Вячорка тлумачыць, што ім прыйшоў запыт на размову з Парашэнкам. З той прычыны, што гэта была не тэт-а-тэт размова, а сазвон, то дадатковай верыфікацыі не праводзілі.
«Для Святланы Ціханоўскай сазвоны з лідарамі краін — гэта звычайная справа. Да нас прыйшоў запыт аб размове — ну, давайце пагаворым. Гэта звычайная працэдура. Мы ў прынцыпе кожны тыдзень па пятніцах робім відэаразмовы з усімі ахвотнымі.
Часам вар'яты прыходзяць на такія сазвоны. У цэлым, калі табе няма чаго хаваць, то ніякія пранкеры не страшныя. Святлана спачатку гаварыла максімальна карэктна і даносіла пазіцыю, якую мы даносім паўсюль», — расказаў Вячорка.
Але, маўляў, хутка беларускія палітыкі зразумелі, што іх падманваюць — гэта стала ясна, калі слова ўзяў «Парашэнка».
«Гэта было відэа. На ім быў твар нібыта Парашэнкі, але з такой затрымкай, што складана было адрозніць. «Парашэнка» патлумачыў гэта кепскай сувяззю — мне здаецца, там былі згенераваныя відэа, дзе «Парашэнка» маўчыць і дзе гаворыць.
Фактычна, што гэта падман, стала ясна адразу, калі загаварыў «Парашэнка». Ён гаварыў з рускім акцэнтам — у слове Славянск націск паставіў на «а»!
Ну і голас быў непадобны, мы зразумелі, што адбываецца, але не клалі трубку. Вырашылі выйсці прыгожа, і я папрасіў «Парашэнку» размаўляць па-ўкраінску. Ён паплыў, ну і ўсё», — дадаў Вячорка.
Размова адбылася паўтара тыдні таму.
Цяпер чытаюць
Ярмошына: Я не пайду ў грамадскую лазню, проста таму што баюся20
Каментары