Байдэн назваў Сі Цзіньпіна дыктатарам праз дзень пасля візіту дзяржсакратара ў Пекін
Усяго праз дзень пасля прымірэнчага візіту дзяржсакратара ЗША Энтані Блінкена ў Кітай прэзідэнт ЗША Джо Байдэн назваў кітайскага лідара Сі Цзіньпіна дыктатарам. Пекін пакуль не адрэагаваў, піша Бі-бі-сі.
Джо Байдэн назваў Сі Цзіньпіна дыктатарам, калі распавядаў пра рэакцыю Сі на збіты ў пачатку года над ЗША кітайскі выведвальны зонд.
Байдэн сказаў, выступаючы ў Каліфорніі, што Сі Цзіньпін быў вельмі незадаволены тым, як развіваўся скандал вакол гэтага зонда.
«А прычына, чаму Сі Цзіньпін быў вельмі незадаволены, калі я збіў той паветраны шар з двума вагонамі шпіёнскай апаратуры, была ў тым, што ён не ведаў пра гэты шар, — сказаў Байдэн. — А гэта дыктатарам вельмі не падабаецца, калі яны не ведаюць, што адбываецца».
У нядзелю і панядзелак Пекін наведаў дзяржсакратар ЗША Энтані Блінкен. Мэта яго візіту была ў тым, каб знізіць напружанасць у адносінах КНР і ЗША, якая прыкметна вырасла апошнія месяцы.
У панядзелак Блінкен сустрэўся з Сі Цзіньпінам. Сі сказаў, што на сустрэчы быў дасягнуты пэўны прагрэс, а Блінкен даў зразумець, што абодва бакі гатовыя да працягу перамоў. Дзяржсакратар канстатаваў, што сур'ёзныя рознагалоссі паміж Пекінам і Вашынгтонам захоўваюцца.
Гэтыя рознагалоссі датычаць гандлёвай палітыкі, лёсу Тайваня, які Кітай пагражае захапіць сілай, а таксама захавання правоў чалавека ў КНР.
Гэта быў першы візіт кіраўніка замежнапалітычнага ведамства ЗША ў Кітай за пяць гадоў.
Цяпер чытаюць
«Быў упэўнены, што я недатыкальная асоба для расіян». Першае інтэрв'ю Юрася Зянковіча на свабодзе14
Каментары