Скарэктавалі закон «Аб мовах» у сферы афармлення дакументаў, судаводства і мовы адукацыі
Скарэктаваны закон апублікаваны на Нацыянальным прававым інтэрнэт-партале. Змены ў законе датычаць афармлення дакументаў беларусаў, судаводства і мовы адукацыі, піша «Радыё Свабода».
Згодна з унесенымі зменамі, звычайны і біяметрычны пашпарты, ID, біяметрычны дыпламатычны і службовы пашпарты выдаюцца на беларускай, рускай і англійскай мовах (арт. 10). У ранейшай версіі закона замест апошняй былі пазначаныя «іншыя мовы».
Судаводства і адміністрацыйныя працэсы (арт. 14, 15) можна весці на беларускай і (або) рускай мовах. Раней было размежаванне: на беларускай або рускай.
Права на атрыманне адукацыі (арт. 21) на беларускай і (або) рускай мовах зафіксавалі для сістэм навукова-арыентаванай адукацыі і дадатковай адукацыі адораных дзяцей і моладзі.
Змянілася назва артыкула: «Права на выхаванне і атрыманне адукацыі на нацыянальнай мове» на «Права на атрыманне адукацыі на дзяржаўных мовах Рэспублікі Беларусь».
На мовах нацыянальных меншасцяў дазваляецца перадусім вывучэнне іх роднай мовы і літаратуры ў асобных групах і класах паводле рашэння мясцовых органаў улады, узгодненага з Міністэрствам адукацыі.
Аднак цалкам магчымасці атрымання ўсёй адукацыі на гэтай мове гэта не адмяняе, бо ў артыкуле 22 ёсць такі пункт: «Ва ўстановах адукацыі, якія рэалізуюць адукацыйныя праграмы дашкольнай, агульнай сярэдняй, спецыяльнай адукацыі, навучанне і выхаванне пры наяўнасці ўмоў і па ўзгадненні з Міністэрствам адукацыі могуць ажыццяўляцца на замежнай мове».
Нібыта знята патрабаванне для кіраўнікоў сістэмы адукацыі валодаць беларускай мовай, якое раней прапісвалася адмыслова. Цяпер гэты абавязак у тым пункце дзейнічае толькі для педагагічных работнікаў. Аднак у арт. 4 абноўленага Закона па-ранейшаму ёсць абавязак кіраўнікоў, іншых работнікаў дзяржаўных органаў i iншых арганiзацый валодаць беларускай і рускай мовамі і, зыходзячы з яго, кіраўнікі школ выключэння складаць не павінны.
У артыкуле 22 зняты абзац, які рэгламентуе механізм выбару мовы навучання ў пэўнай установе адукацыі:
«Асноўная мова навучання і выхавання (беларуская або руская) вызначаецца заснавальнікам установы адукацыі (арганізацыі, якой у адпаведнасці з заканадаўствам дадзена права ажыццяўляць адукацыйную дзейнасць), індывідуальным прадпрымальнікам, якому ў адпаведнасці з заканадаўствам дадзена права ажыццяўляць адукацыйную дзейнасць, з улікам пажаданняў навучэнцаў (законных прадстаўнікоў непаўналетніх навучэнцаў)».
Змены набываюць моц пасля афіцыйнага апублікавання.
Каментары
Кадлубай (пасля ягонага тлумачэння на конт ужывання ў беларускай мове слова "фамілія" замест "прозвішча") апладуе стоячы
вы так жадалі яе пазбавіцца, цяперака атрымалася, жрыце абедзьвума рукамі, не задушыцеся!
Ў хуткім часе паедзеце ў танках зваркай завараных на штурм суседзей пад наглядам музыкаў повара.
Цьфу, яшчэ і памялом мелюць, што паважаюць Мову, "но пакашто німогут на ней гаварыць"
Гідоты.