Украіна атрымала ад ЗША сістэмы VAMPIRE для барацьбы з расійскімі дронамі
Пентагон паведаміў, што згодна з кантрактам, заключаным яшчэ ў студзені, чатыры з 14 сістэм прыбылі ва Украіну летам і ўжо выкарыстоўваюцца. Астатнія павінны быць пастаўленыя да канца года.
Паводле даных Пентагона, на якія спасылаецца Bloomberg, украінскія войскі цяпер выкарыстоўваюць амерыканскую ракетную сістэму, вядомую як VAMPIRE, для знішчэння расійскіх беспілотнікаў.
VAMPIRE — партатыўная мнагамэтавая сістэма ўзбраення, распрацаваная амерыканскай кампаніяй аэракасмічных і абаронных тэхналогій L3Harris. Першы прататып сістэмы быў распрацаваны ў 2021 годзе. У 2022 годзе быў прэзентаваны ўдасканалены варыянт.
Сістэма дае сухапутным войскам хуткае, недарагое і эфектыўнае рашэнне для разгортвання ўзбраення, бо можа быць усталяваная на любую вайсковую або цывільную машыну, якая мае грузавую платформу, усяго за дзве гадзіны. Ёю можа кіраваць усяго адзін чалавек, а модульная і партатыўная канструкцыі дазваляюць аператару хутка хавацца, перамяшчацца і весці агонь.
Сістэма VAMPIRE спраектаваная як цалкам аўтаномная, якая можа ўключаць у сябе розныя датчыкі і пакеты ўзбраення ў залежнасці ад патрэб місіі.
VAMPIRE, якая пастаўляецца Украіне, абсталяваная сістэмай лазернага навядзення APKWS для некіравальных ракет Hydra 70, што дазволіць хутка адсочваць, пазначаць лазерам і паражаць наземныя і паветраныя цэлі, якія выходзяць за межы далёкасці дзеяння звычайнай зброі.
У спалучэнні з некантактным узрывальнікам VAMPIRE можа забяспечыць павышаную эфектыўнасць выбуху і лятальнасць. Некантактны ўзрывальнік дазваляе перахапляць беспілотнік з меншымі выдаткамі, чым іншыя метады, а дзякуючы лазернаму навядзенню ракеты, якое актывуецца пры запуску, не патрабуецца захопу цэлі перад запускам.
Як адзначае Bloomberg, у красавіку Пентагон заявіў, што заключыў кантракт на пастаўку Украіне 10 мабільных сістэм VAMPIRE з лазерным навядзеннем, але не агучыў дадатковай інфармацыі наконт іх.
У адрозненне ад асноўнай вайсковай дапамогі ЗША Украіне, якая паступае з існых запасаў, кантракт на сістэмы VAMPIRE коштам 40 мільёнаў даляраў непасрэдна закранае абаронную прамысловасць у рамках праграмы «Ініцыятыва садзейнічання бяспецы Украіны».
Чытайце яшчэ:
ЗША закупяць для Украіны ракеты AMRAAM. Што пра іх вядома
Апублікавана ВІДЭА запуску новай украінскай ракеты
Украіна атрымае першыя дзесяць танкаў Abrams ужо ў гэтым месяцы
Цяпер чытаюць
Квадрат у Мінску каштуе рэкордна дорага: нарэшце пабіты рэкорд 2007 года2
Каментары