Новая сенсацыя на раскопках у Полацку: археолагі знайшлі скарб старажытных візантыйскіх манет
Археалагічныя даследаванні на тэрыторыі гарадскога стадыёна ў Полацку працягваюць здзіўляць новымі адкрыццямі. Пра знаходкі апошніх дзён распавёў gorod214.by старшы выкладчык кафедры гісторыі і турызму Полацкага дзяржаўнага ўніверсітэта Аляксей Коц.
Нагадаем, што раней археолагі знайшлі шмат матэрыялаў, якія сталі падцвярджэннем існавання на гэтым месцы буйной вытворчасці па апрацоўцы каляровых металаў — так званага квартала ювеліраў.
А днямі ў ювелірнай майстэрні быў знойдзены скарб медных візантыйскіх фолісаў. Гэта старажытныя манеты, адчаканеныя на мяжы X—XI стст., якія патрапілі ў Полацк у XI стагоддзі. Гаспадар схаваў іх пад печкай-каменкай, дзе плавілі каляровыя металы.
Дзве манеты знаходзяцца ў добрым стане, на адным баку прачытваецца надпіс-легенда, на другім — аблічча правіцеля-імператара. Папярэдне навукоўцы мяркуюць, што гэта Васіль II Балгарабойца, пры якім падтрымліваліся цесныя сувязі Кіеўскай Русі і Візантыйскай імперыі.
Пашкоджаныя манеты ўжо накіраваныя на рэстаўрацыю ў музей-запаведнік.
Унікальнасць знаходкі ў тым, што раней у Беларусі, як патлумачыў Аляксей Коц, у межах археалагічных раскопак візантыйскіх скарбаў не знаходзілі. Адзінкавыя манеты былі, а ў складзе калекцыі яны трапіліся ўпершыню.
Яшчэ адзін каштоўны артэфакт — фрагмент падвескі ў выглядзе сякеркі, што служыла абярэгам для ваяра. На сякерцы напаяна птушачка. Знаходка датуецца XI—XII стагоддзямі і раней падобных прыкладаў на тэрыторыі краіны зусім не сустракалася. Насіць такія рэдкія статусныя рэчы маглі толькі ваяры высокага рангу.
Рэдкімі з’яўляюцца таксама фрагменты фальшывых дырхемаў, якія не завозіліся з Арабскага халіфата, а выплаўляліся непасрэдна на месцы. Цікава, што ў 1980-я гады археолаг Сяргей Тарасаў знайшоў падчас раскопак у Полацку ліцейную форму для вырабу такіх манет.
Цяпер чытаюць
Памятаеце чыноўніка, якога крэатыўна адмазалі ад забойства чалавека на паляванні? Ён адмазаўся зноў3
Каментары