З’явілася галерэя рэпрэсаванага беларускага мастацтва. Карціны можна замовіць з дастаўкай па ўсім свеце
Анлайн-каталог карцін рэпрэсаваных мастакоў стварылі ў «Доме творцаў». Вось ужо больш як год гэты праект Сержука Доўгушава падтрымлівае беларускіх аўтараў. Для іх у «Доме» рабілі рэзідэнцыі і ладзілі паспяховыя выставы. Чарговым крокам наперад стала галерэя, якая не толькі пазнаёміць з творчасцю беларускіх аўтараў, але і дасць магчымасць замовіць іх работы. Дастаўку абяцаюць па ўсім свеце. Пра стварэнне ўнікальнага анлайн-каталога Budzma.org паразмаўляла з куратаркай «Дома творцаў» Вольгай Шніп.
«Гэта першы пункт для мастакоў «Дома творцаў», які можа ўзрасці да нечага большага — а гэта ўжо ў планах», — расказвае Воля пра галерэю, якая аб’яднала 15 мастакоў. Сярод іх Антось Радзівонаў, Тася Валошка, Міхась Чыбоўскі, Віктар Сяргей, Вольга Шніп. І ўсё ж большасць работ у галерэі — ананімныя.
«Не ўсе могуць падпісвацца сваімі сапраўднымі імёнамі па зразумелых нам усім прычынах. І гэта вельмі балюча. Але, збіраючы творы ў каталог, мы такім чынам можам захоўваць творы і даваць розным людзям магчымасць пазнаёміцца з гэтымі працамі. Хай нават пакуль без імён», — адзначае Вольга.
Зрэшты, на сітуацыю можна паглядзець і з іншай перспектывы:
«Затое як цікава будзе потым дазнацца ў будучыні, што ты калісьці набыў карціну вось такога беларускага мастака!»
«Над каталогам асабіста працую я. Але мне на радасць з’явілася адна вельмі таленавітая мастачка Даша, якая дапамагае. Ёй прывітанне», — працягвае свой аповед Вольга.
«У нашай галерэі — працы мастакоў, якія прайшлі тым ці іншым шляхам праз «Дом творцаў», яго розныя праекты, рэзідэнцыі, выставы. Таму мы ўсіх называем з любоўю «нашымі» мастакамі. Але ёсць і аўтары, якія пішуць нам у асабістыя з просьбай аб размяшчэнні іх прац у каталогу. І мы адкрытыя да зваротнай сувязі і заўсёды ідзём насустрач. Бо наша мэта — пазнаёміць свет з разнастайнасцю стыляў, тэхнік і жанраў беларускага мастацтва».
У галерэі — самыя розныя работы. Пераважна гэта жывапісныя палотны, кошт якіх стартуе ад 100 долараў. Самая дарагая праца — 1500.
— Воля, а што цябе кранае ў гэтым праекце?
— Тое, што, нягледзячы на ўсякія цяжкасці, з якімі мы сутыкаемся, з нашым бясконцым альтруізмам дзеля папулярызацыі беларускага мастацтва мы не спыняемся. А нашы мастакі ўражваюць сваімі працамі, сваімі думкамі, ідэямі і сваім асабістым светам.
— Ёсць любімыя карціны ў каталогу?
— Мне шмат твораў падабаецца. Я люблю рознае мастацтва. І, дарэчы, сам «Дом творцаў» я ўпрыгожваю карцінамі нашых мастакоў. І для кожнай працы знаходзіцца сваё месца. Але сцен не так шмат, таму я перыядычна мяняю нашу стацыянарную галерэю, каб астатнім карцінам не крыўдна было.
Любую працу з анлайн-каталога можна замовіць з дастаўкай па ўсім свеце. Вольга кажа, што галерэя будзе абавязкова папаўняцца новымі працамі, бо нават цяпер гэта далёка не ўсе карціны і не ўсе мастакі, якія прайшлі праз праект.
— Хутка будуць новыя працы. І каталог створаны такім чынам, каб мы маглі яго заўсёды абнаўляць. Таму сачыце за нашымі навінамі.
Мастацтва, на мой погляд, — гэта найлепшы падарунак. А набываючы мастацкі твор, вы сапраўды дапамагаеце ў развіцці адной з галін нашай культуры.
Чытайце таксама:
Жэрар Дэпард'ё прадаў скульптуру ўраджэнца Беларусі — прадстаўніка Парыжскай школы
Цяпер чытаюць
Дзяржаўная раёнка апублікавала здымак Качанавай без рэтушы. Гэта значна адрозніваецца ад таго, што мы прывыклі бачыць14
Каментары