Źjaviłasia halereja represavanaha biełaruskaha mastactva. Karciny možna zamović z dastaŭkaj pa ŭsim śviecie
Anłajn-katałoh karcin represavanych mastakoŭ stvaryli ŭ «Domie tvorcaŭ». Voś užo bolš jak hod hety prajekt Sieržuka Doŭhušava padtrymlivaje biełaruskich aŭtaraŭ. Dla ich u «Domie» rabili rezidencyi i ładzili paśpiachovyja vystavy. Čarhovym krokam napierad stała halereja, jakaja nie tolki paznajomić z tvorčaściu biełaruskich aŭtaraŭ, ale i daść mahčymaść zamović ich raboty. Dastaŭku abiacajuć pa ŭsim śviecie. Pra stvareńnie ŭnikalnaha anłajn-katałoha Budzma.org parazmaŭlała z kuratarkaj «Doma tvorcaŭ» Volhaj Šnip.
«Heta pieršy punkt dla mastakoŭ «Doma tvorcaŭ», jaki moža ŭzraści da niečaha bolšaha — a heta ŭžo ŭ płanach», — raskazvaje Vola pra halereju, jakaja abjadnała 15 mastakoŭ. Siarod ich Antoś Radzivonaŭ, Tasia Vałoška, Michaś Čyboŭski, Viktar Siarhiej, Volha Šnip. I ŭsio ž bolšaść rabot u halerei — ananimnyja.
«Nie ŭsie mohuć padpisvacca svaimi sapraŭdnymi imionami pa zrazumiełych nam usim pryčynach. I heta vielmi baluča. Ale, źbirajučy tvory ŭ katałoh, my takim čynam možam zachoŭvać tvory i davać roznym ludziam mahčymaść paznajomicca z hetymi pracami. Chaj navat pakul bieź imion», — adznačaje Volha.
Zrešty, na situacyju možna pahladzieć i ź inšaj pierśpiektyvy:
«Zatoje jak cikava budzie potym daznacca ŭ budučyni, što ty kaliści nabyŭ karcinu voś takoha biełaruskaha mastaka!»
«Nad katałoham asabista pracuju ja. Ale mnie na radaść źjaviłasia adna vielmi talenavitaja mastačka Daša, jakaja dapamahaje. Joj pryvitańnie», — praciahvaje svoj apovied Volha.
«U našaj halerei — pracy mastakoŭ, jakija prajšli tym ci inšym šlacham praz «Dom tvorcaŭ», jaho roznyja prajekty, rezidencyi, vystavy. Tamu my ŭsich nazyvajem ź luboŭju «našymi» mastakami. Ale jość i aŭtary, jakija pišuć nam u asabistyja z prośbaj ab raźmiaščeńni ich prac u katałohu. I my adkrytyja da zvarotnaj suviazi i zaŭsiody idziom nasustrač. Bo naša meta — paznajomić śviet z raznastajnaściu stylaŭ, technik i žanraŭ biełaruskaha mastactva».
U halerei — samyja roznyja raboty. Pieravažna heta žyvapisnyja pałotny, košt jakich startuje ad 100 dołaraŭ. Samaja darahaja praca — 1500.
— Vola, a što ciabie kranaje ŭ hetym prajekcie?
— Toje, što, niahledziačy na ŭsiakija ciažkaści, ź jakimi my sutykajemsia, z našym biaskoncym altruizmam dziela papularyzacyi biełaruskaha mastactva my nie spyniajemsia. A našy mastaki ŭražvajuć svaimi pracami, svaimi dumkami, idejami i svaim asabistym śvietam.
— Jość lubimyja karciny ŭ katałohu?
— Mnie šmat tvoraŭ padabajecca. Ja lublu roznaje mastactva. I, darečy, sam «Dom tvorcaŭ» ja ŭpryhožvaju karcinami našych mastakoŭ. I dla kožnaj pracy znachodzicca svajo miesca. Ale ścien nie tak šmat, tamu ja pieryjadyčna mianiaju našu stacyjanarnuju halereju, kab astatnim karcinam nie kryŭdna było.
Lubuju pracu z anłajn-katałoha možna zamović z dastaŭkaj pa ŭsim śviecie. Volha kaža, što halereja budzie abaviazkova papaŭniacca novymi pracami, bo navat ciapier heta daloka nie ŭsie karciny i nie ŭsie mastaki, jakija prajšli praz prajekt.
— Chutka buduć novyja pracy. I katałoh stvorany takim čynam, kab my mahli jaho zaŭsiody abnaŭlać. Tamu sačycie za našymi navinami.
Mastactva, na moj pohlad, — heta najlepšy padarunak. A nabyvajučy mastacki tvor, vy sapraŭdy dapamahajecie ŭ raźvićci adnoj z halin našaj kultury.
Čytajcie taksama:
Žerar Depardjo pradaŭ skulpturu ŭradženca Biełarusi — pradstaŭnika Paryžskaj škoły
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1111
Kamientary