Жлабінчанку, якая «моцна любіць Лукашэнку», але паскардзілася на мясцовую міліцыю, не пакідаюць у спакоі. Яе зноў судзілі
Як паведамляюць гомельскія праваабаронцы, 70-гадовую пенсіянерку Еву Піскун цяпер судзілі за «распаўсюд экстрэмісцкіх матэрыялаў».
24 кастрычніка ў раённым судзе Жлобіна суддзя Святлана Рубахава разглядала адміністрацыйную справу па ч. 2 арт. 19.11 КаАП РБ (распаўсюд інфармацыйнай прадукцыі, уключанай у рэспубліканскі спіс экстрэмісцкіх матэрыялаў, а таксама выраб, выданне, захоўванне або перавозка з мэтай распаўсюджвання такой інфармацыі), якая вялася супраць Евы Піскун.
Вынік пастановы суда праваабаронцам пакуль невядомы.
16 мая 2023 года ў судзе Жлобінскага раёна суддзёй Святланай Андрэевай разглядалася крымінальная справа, якая была ўзбуджана па артыкуле 188 Крымінальнага кодэкса РБ (паклёп) у адносінах да Евы Піскун.
У кастрычніку стала вядома, што 70-гадовая жанчына да суда ўтрымлівалася ў ІЧУ Жлобіна і атрымала вялікі штраф.
Сваім сукамерніцам пенсіянерка распавядала, што назвала ў відэа ў сацыяльнай сетцы былога начальніка міліцыі службовым злачынцам, бо ён ніяк не рэагаваў на яе звароты. Ёй патэлефанавалі з пракуратуры пад маркай падпісаць нейкія дакументы. Нібыта яны разабраліся. Бабуля прыйшла, і яе затрымалі.
Адбылося гэта, нягледзячы на тое, што жанчына зʼяўляецца прыхільніцай Лукашэнкі.
— Бабуля расказвала: «Я ж вельмі моцна люблю Лукашэнку. Я прымала ўсе папраўкі, якія былі. Як так мяне маглі пасадзіць да суда?» — распавядала былая сукамерніца Евы Піскун.
Знаёмы жанчыны расказаў журналістам, што пасля здзекаў у ізалятары Ева знаходзіцца ў шоку. Суд прызначыў ёй вялізны штраф, які яна не ведае, як выплаціць.
Паводле «Флагштока», Генадзь Мельнік, з-за якога пенсіянерка трапіла пад пераслед, больш не ўзначальвае Жлобінскі РАУС — ён атрымаў павышэнне ў Следчым камітэце ў Гомелі. Аднак міліцыянты не пакідаюць Еву Піскун у спакоі.
Цяпер чытаюць
«Быў упэўнены, што я недатыкальная асоба для расіян». Першае інтэрв'ю Юрася Зянковіча на свабодзе18
Каментары