Міліцыянер афармляў адміністратыўкі на невінаватых людзей, яго пасадзілі
29 сакавіка суд Партызанскага раёна Мінска прысудзіў былога ўчастковага да трох гадоў калоніі паводле артыкула аб злоўжыванні службовымі паўнамоцтвамі (частка 2 артыкула 426 КК). Ён афармляў адміністрацыйныя справы на невінаватых людзей, піша «Люстэрка» са спасылкай на банк судовых рашэнняў.
Для фальсіфікацыі ўчастковы выбіраў часцей за ўсё справы, якія тычыліся шуму ў кватэрах і дамах, а таксама за распіццё алкаголю ў грамадскім месцы. Нераскрытую справу абвінавачваны афармляў на меркаванага парушальніка або выбіраў яго проста з жыхароў свайго ўчастка. Урэшце ўчастковы складаў пратаколы апытання «парушальніка» і выпісваў яму папярэджанне.
Высветлілася, што міліцыянт такім чынам вынес 14 незаконных пастаноў. Але ўрэшце гэта выявілі, супрацоўніка міліцыі звольнілі і завялі на яго крымінальную справу. Да суда абвінавачаны знаходзіўся на волі пад асабістым паручальніцтвам і падпіскай аб нявыездзе.
На судзе абвінавачаны прызнаў сваю віну і патлумачыў, навошта гэта рабіў. Маўляў, падчас службы ў Партызанскім РУУС на ягоным участку моцна не хапала міліцыянераў, ён працаваў адзін, была вялікая загружанасць і ён не спраўляўся. Да таго ж бывала, што пачыналася праверка па адміністрацыйнай справе, але не заўсёды ўдавалася ва ўстаноўлены тэрмін вызначыць парушальніка, звязацца з ім, высветліць, дзе ён знаходзіцца. А ў перыяд, калі ён працаваў у Ленінскім раёне, да гэтага дадавалася тое, што на ўчастку быў складаны кантынгент, шмат людзей, з якімі трэба праводзіць прафілактычную працу.
Таму мужчына і вырашыў у некаторых выпадках без выкліку фігурантаў складаць па матэрыялах праверак і падпісваць ад іх імя тлумачэнні, пратаколы аб правядзенні гутарак і г. д., а пасля спыняць справы, выносячы толькі папярэджанне. Гэта дазваляла яму пазбегнуць прэтэнзій начальства за нявырашаныя справы і дрэнныя паказчыкі.
У выніку суд пастанавіў прызначыць былому міліцыянеру тры гады пазбаўлення волі ў калоніі ва ўмовах агульнага рэжыму. Таксама ён абавязаны выплаціць штраф памерам 300 базавых велічынь, гэта значыць 12 000 рублёў. Акрамя таго, мужчыну забаранілі займаць міліцэйскія пасады на пяць гадоў. Асуджанага ўзялі пад варту ў зале суда.
-
У Беларусі прадаецца рэдкая манета, якую можна выкарыстоўваць як аб'ектыў у фотаапараце. Што за яна?
-
У беларускай краме ізраільскія авакада каштуюць танней, чым айчынныя агуркі
-
Беларусы расказалі, як 20 дзён хадзілі па арктычнай глухмені. Цяпер там ёсць перавалы Васіля Быкава і Уладзіміра Караткевіча
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары
https://t.me/allians_belarus/196