«Мой муж Ігар Кушнерскі перадае буйныя сумы наяўных грошай Латушку і Пуцілу». Што гэта за данос?
У злітай базе зваротаў у КДБ знайшоўся данос ад імя Алены Кушнерскай — жонкі 61-гадовага беларускага бізнэсмена Ігара Кушнерскага.
Кушнерскі займаўся рознымі сферамі — працаваў камерцыйным дырэктарам МАЗа, быў дыстрыб'ютарам аўтатэхнікі расійскіх заводаў, інвеставаў у офісную нерухомасць, вырабляў піва. Апошнім буйным праектам Кушнерскага быў завод па вырабе дзіцячага харчавання пад брэндам «Лыжка ў далоньцы» («Ложка в ладошке»).
«Я вельмі баюся за лёс маіх дзяцей і перажываю за сваю краіну. У нашым доме ў Іспаніі сталі частымі гасцямі Арцём Шапараў і Сцяпан Пуціла. Мой муж Кушнерскі Ігар перадае ім рэгулярна буйныя сумы наяўных. Цяпер у наш дом стаў прыязджаць Павел Латушка — яму таксама перадаваліся буйныя сумы наяўных. Пра што ідуць размовы, мне невядома», — такое паведамленне прыйшло ў КДБ у сакавіку 2023 года з аднаразовага мэйла [email protected] нібыта ад Алены Кушнерскай.
Калі данос апублічыўся, гэта стала прадметам жартаў і абмеркаванняў у камерцыйных колах. «Наша Ніва» распытала прадстаўнікоў фінансавай супольнасці сталіцы, што яны думаюць пра сітуацыю. Суразмоўцы бачаць у гэтай гісторыі двайное дно і нечы разлік. Мы апускаем прозвішчы.
«У завод дзіцячага харчавання Кушнерскі ўклаўся, не маючы адпаведнай экспертызы, а паверыўшы мінарытарнаму партнёру. І бізнэс пайшоў на дно. Якраз у гэты час, у канцы 2022 — пачатку 2023, яны былі моцна перасвараныя паміж сабой, калі лічылі, як дзяліць страты. Я б звязваў з гэтым. З помстай», — сказаў «Нашай Ніве» мінскі банкір.
Такой жа думкі трымаецца іншы суразмоўца:
«З «Лыжкай у далоньцы» ўсё прыгожа развівалася: узялі заходнія грошы, пабудавалі ў 2020-м вялікі завод пад Дзяржынскам, атрымалі еўрапейскія сертыфікаты, жыві і радуйся. Але тут вайна, адвальванне ўкраінскага і еўрапейскага рынкаў, валютныя крэдыты. У канцы 2022-га ў іх здарыўся дэфолт па аблігацыях. Пакрыць даўгі не хапала прыбыткаў. Я б сказаў, на каго я думаю, але гэта ўсё бяздоказнае. Я аналізую толькі кантэкст даносу: пачатак 2023-га, спробы знайсці грошы ці выгадна прадацца, каб вылезці з банкруцтва, маса канфліктаў унутры кампаніі.
А каб у той час гэты чалавек падтрымліваў названых асобаў, а здала яго жонка… хрэнь нейкая», — сказаў іншы фінансіст.
Цікава, што данос на Кушнерскага не адзіны. У жніўні 2021 года на яго ўжо пісалі ў КДБ у падобнай стылістыцы.
«Лічу сваім абавязкам паведаміць, што Ігар Кушнерскі праз свайго літоўскага партнёра выводзіць грошы з Беларусі і фінансуе апазіцыю, якая ўцякла ў Літву і Еўропу ў асобе Ціханоўскай», — гаварылася ў звароце, падпісаным іменем барысаўскага бізнэсмена Сяргея Максімука.
Мяркуючы па ўсім, першы данос не спрацаваў. І амаль праз два гады інфармацыю прадублявалі, цяпер ужо ад імя нібыта жонкі Кушнерскага.
Цяпер чытаюць
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»2
Каментары