Былы беларускі дыпламат Павел Мацукевіч падмячае цікавыя дэталі нядаўняга візіту прэм'ер-міністра Рамана Галоўчанкі ў Егіпет.
Галоўчанка наведаў Егіпет 29-30 красавіка. Мацукевіч у сваім тэлеграм-канале заўважае: гэты візіт афіцыйны, таму прадугледжвае максімум пратакольных фармальнасцей і гасціннасці.
«Набор знакаў увагі вызначаецца дзяржавай, якая прымае госця, з разлікам на ўзаемнасць. З таго, што трапіла ў кадр у егіпецкім выпадку — дывановая дарожка ля трапа прэм'ерскага самалёта, ганаровая варта, аркестр, выкананне гімнаў і прэм'ер-міністр Егіпта, які ўласнай персонай прыбыў у аэрапорт для цырымоніі сустрэчы калегі з Беларусі».
Шлях з Мінска да Каіра з улікам неабходнасці аблёту займае 6-7 гадзін лета.
Эмбраер «Белавія», які дастаўляў кіраўніка ўрада, не можа прарабіць такі шлях без дазапраўкі, а ўрадавыя Боінгі 737 і 767, якімі карыстаецца Лукашэнка і якім такія пералёты па сілах, Галоўчанку недаступныя — «не той тарыфны план», тлумачыць Мацукевіч. Ёсць яшчэ бізнэс-джет «Бамбардзье», які часам транспартуе прэм'ера, але не ў гэты раз. Магчыма, з-за даўжыні спісу суправаджальных асоб, не сумяшчальнай з салонам джэта.
«Таму стандартны пасажырскі Эмбраер і вымушаная пасадка ў Сочы для дазапраўкі. Пры чым па шляху ў Каір Галоўчанка скарыстаўся дазапраўкай для сустрэчы з мэрам Сочы, а вось як Раман Аляксандравіч прабавіў час на зваротным шляху, пакуль бакі самалёта запаўняліся газай, засталося загадкай», — піша былы дыпламат.
Даставіўшы Галоўчанку ў Мінск самалёт вярнуўся да сваёй рэйсавай праграмы: калі верыць флайтрадару, «Эмбраер» адправіўся са звычайнымі пасажырамі ў Санкт-Пецярбург.
«Вось як блізкі прэм'ер у Беларусі да народа і як далёкі яго начальнік», — дадае Мацукевіч не без долі іроніі.
Цяпер чытаюць
Масавыя арышты афіцэраў прайшлі на авіябазе ў Мачулішчах — абвінавачваюць у сувязях з апазіцыяй8
Каментары