Некаторыя 11-класнікі, якія плануюць паступаць за мяжу, не могуць атрымаць у Мінадукацыі патрэбную даведку
Будучыя выпускнікі, якія сёлета збіраюцца паступаць за мяжу, сутыкнуліся з праблемай.
У дадатак да апастылю атэстата ВНУ просяць у іх даць даведку, што школа, якую абітурыент сканчае, можа выдаваць дакументы дзяржузору. Аднак Дэпартамент якасці адукацыі ў атрыманні такога дакумента нечакана стаў адмаўляць, піша «Люстэрка».
Андрэй — тата 11-класніка, які сёлета збіраецца паступаць у адзін з польскіх універсітэтаў. Мужчына распавядае, што звычайна даведку, пра якую ідзе гаворка, выпускнікі бралі ў Дэпартаменце кантролю якасці адукацыі Мінадукацыі.
— У дакуменце ўтрымліваецца інфармацыя, што школа, якую скончыла дзіця, мае акрэдытацыю ў Беларусі і можа выдаваць дакументы дзяржаўнага ўзору, — тлумачыць суразмоўца. — Акрамя таго, у ёй указваюць, што атэстат, які падаў абітурыент, пацвярджае: яго ўладальнік сапраўды атрымаў агульную сярэднюю адукацыю і можа працягнуць вучобу ва ўстановах прафесійна-тэхнічнай, сярэдняй спецыяльнай і вышэйшай адукацыі на тэрыторыі Беларусі.
Яшчэ ў даведцы ёсць звесткі «аб адпаведнасці адзнак». Напрыклад, тое, што ацэнкі 9-10 балаў адпавядаюць пяцёрцы («выдатна»), а, дапусцім, 6-8 — чацвёрцы («добра»).
Андрэй дакладна не ведае, ці патрэбныя такія даведкі ва ўсе замежныя ВНУ. Але польскі ўніверсітэт, куды збіраецца яго сын, такі дакумент просіць. Сын гэтай вясной змог атрымаць патрэбную даведку. А вось іх знаёмым, якія звярнуліся ў Дэпартамент кантролю якасці адукацыі на днях, у ёй адмовілі.
Патлумачылі гэта тым, што нібыта яе выдача не прадугледжаная законам і раней яе таксама нельга было выпісваць.
Па словах суразмоўцы, у чатах дзеці, якія ў гэтым годзе збіраюцца паступаць за мяжу, і іх бацькі, пішуць, што і іншыя абітурыенты, якія звярнуліся нядаўна ў Дэпартамент, таксама сутыкнуліся з падобнай праблемай.
— Знаёмым сказалі, калі гэтую даведку ўключаць ва ўказ № 200, то яе выдадуць, — распавядае суразмоўца і тлумачыць: — у гэтым дакуменце апісаны адміністрацыйныя працэдуры, якія тычацца адукацыі (напрыклад, дублікаты якіх дакументаў можна атрымаць). Тут сапраўды няма звестак аб гэтай даведцы.
Што кажуць чыноўнікі?
У Дэпартаменце кантролю якасці адукацыі сітуацыю з даведкамі пацвердзілі. У прыёмнай не адмаўлялі, што летась выпускнікі такі дакумент атрымлівалі.
— [Але] на сённяшні дзень мы такую інфармацыю ўжо не выдаем, — паведамілі там, — гэта не адносіцца да пераліку адміністрацыйных працэдур (не ўваходзіць у пералік [дакументаў], зацверджаных указам Лукашэнкі ад 2010 года №200). Таму мы, як дзяржорган, выдаваць такую інфармацыю не можам. У гэты пералік уваходзіць толькі апастыль. Калі вам трэба праапастыляваць дакумент, тады, калі ласка, падыходзьце на Казлова, 28 (адрас дэпартамента).
Таксама журналісты спыталі ў Дэпартаменце, як быць, калі ад гэтага дакумента залежыць паступленне. У ведамстве прапанавалі напісаць у Міністэрства адукацыі электронны зварот. Адказ паабяцалі цягам 15 дзён.
— Гэта будзе як перапіска: вы напісалі, вам адказалі. Ці будзе гэта з'яўляцца дакументам для той жа Польшчы, я не ведаю, — сказалі ў Дэпартаменце.
Акрамя таго, там нагадалі, што некаторыя школы размяшчаюць сертыфікаты з пацвярджэннем акрэдытацыі на сваіх сайтах. Магчыма, выказала здагадку чыноўніца, замежнаму ўніверсітэту будзе дастаткова гэтага фота.
— У нас усе школы акрэдытаваныя, таму яны выдаюць дакумент аб адукацыі, — нагадалі там.
Андрэй распавядае, што людзі, якія трапілі ў такую бюракратычную пастку, у лістах плануюць указваць наступнае: «Я такі, скончыў школу тады, мой атэстат нумар такі, прашу пацвердзіць, што школа (пазначыць яе назву) мае права выдаваць атэстаты і гэты дакумент дазваляе мне далей атрымліваць адукацыю ў ВНУ».
Каментары