І як у Беларусі праходзіць юбілейны год народнага пісьменніка.
Лукашэнка павіншаваў праўладны Саюз пісьменнікаў з 90-годдзем. І тут, як кажуць, ёсць нюанс. І нават не адзін, піша «Салідарнасць».
— Перыяд Вялікай Айчыннай вайны адбіўся ў работах пісьменнікаў, якія самі гераічна абаранялі Радзіму. На сцяне рэйхстага пакінулі свае аўтографы паэты Пятро Прыходзька і Паўлюк Прануза, — гаворыцца ў віншаванні.
На гэтым згадкі беларускіх літаратараў, якія пісалі пра тую вайну, скончыліся. Няма ў святочным тэксце ні слова пра Васіля Быкава, 100-гадовы юбілей якога сёлета адзначаецца ў Беларусі і за яе межамі.
Такі ігнор не дзівіць, бо Лукашэнка з першых дзён знаходжання ва ўладзе помсціў Быкаву за ягоную грамадзянскую пазіцыю і публічныя выступы.
Франтавіку, народнаму пісьменніку давялося з’ехаць з уласнай краіны, атрымаць прыстанішча ў Нямеччыне, з якой ён некалі ваяваў у часе той крывавай вайне.
А калі беларусы развітваліся з Быкавым у чэрвені 2003-га, Лукашэнка з’ехаў са сталіцы з «раптоўнай» інспекцыяй у рэгіёны.
Сёлетні юбілей народнага пісьменніка Беларусі, чыё імя ведаюць па ўсім свеце, на ягонай радзіме праходзіць амаль незаўважна. Некалькі выставаў, адна з якіх зачынілася раней часу, асобны выпуск часопіса і бадай усё.
Пры гэтым дзяржаўнае агенцтва БелТа не пасаромелася паведаміць, што з нагоды 100-гадовага юбілея пісьменнікаў-франтавікоў Уладзіміра Багамолава, Юрыя Бондарава, Васіля Быкава і Барыса Васільева Асацыяцыя саюзаў пісьменнікаў і выдаўцоў Расіі абвесціла 2024-ы Годам лейтэнанцкай прозы.
Нехта можа заўважыць, што Лукашэнка адрасаваў сваё віншаванне Саюзу пад кіраўніцтвам Алеся Карлюкевіча. Маўляў, пры чым тут Васіль Быкаў. І гэта другі нюанс.
Два пісьменніцкія саюзы з’явіліся ў Беларусі ў 2005-м у выніку інспіраванага ўладамі расколу, калі пісьменніка не было ў жывых. Ён меў непасрэднае дачыненне да Саюза, створанага ў 1934-м. І цяжка паверыць у тое, што ягонае імя ў такі год не згадалі ў віншаванні выпадкова.
Каментары
Ўзьнікненьне другога картэлю ў 2005 годзе - барацьба за інстытуцыйныя (дзяржаўныя прывілеі) паміж двума картэлямі.
Гэтыя аб'яднаньні антычытацкія. Паспяховаму пісьменьніку ня трэба саюз з канкурэнтамі-пісьменьнікамі, а трэба прызнаньне чытача.
Варта зазначыць, аднак, что дзяржава можа змушаць дзеля кантроля ляяльнасьці да ўваходу творцаў ў картэльныя аб'яднаньні (пісьменьнікаў ў саюз пісьменьнікаў ў нашым выпадку), а да партачоў (творцаў па-за картэлям) стасаваць рэстрыкцыі
Во як
Ну хочацца зьліцца са сталінскай прэміяй, як клясыкам белліту сваго часу. Ну як вам дапамагчы, салідарненькія