У Бельгіі прастытуцыю прыраўнялі да іншых прафесій. Сэкс-работнікам будуць аплачваць дэкрэт і адпачынак
У Бельгіі прынялі закон, які гарантуе работнікам сэкс-індустрыі абарону іх сацыяльных правоў і магчымасць працаваць па кантракце, паведамляе Euronews. Хоць многія праваабаронцы ад гэтага не ў захапленні.
Дзякуючы закону, зацверджанаму ў маі гэтага года ў Бельгіі, сэкс-работнікі неўзабаве атрымаюць тыя ж сацыяльныя правы, што і прадстаўнікі іншых прафесій. Новыя правілы дазволяць ім заключаць кантракты з ліцэнзаванымі працадаўцамі, і гэта беспрэцэдэнтная спроба навесці парадак у найскладанейшым сектары.
Раней хостэс-бары і салоны эратычнага масажу ў Бельгіі існавалі ў «шэрай» прававой зоне: прастытуткам плацілі наяўнымі або наймалі іх на пасаду афіцыянтак. На думку прыхільнікаў закона, гэта пакідала магчымасць для розных злоўжыванняў.
«Прыемна ведаць, што менавіта гаворыць закон з той ці іншай нагоды, бо раней мы нярэдка сумняваліся, ці правільна робім», — гаворыць Аляксандра Марэлс, уладальніца эратычнага салона, у мінулым медсястра.
Адмяніўшы крымінальную адказнасць за некаторыя формы сутэнёрства, бельгійскія ўлады маюць намер прапісаць выразныя правілы гульні для сектара, стварыўшы прафстатусы, адпаведныя спецыфічным аспектам сэкс-працы, і гарантуючы жанчынам доступ да дапамог па беспрацоўі, медыцынскім страхаванні і дэкрэтным адпачынку.
Для легальнага працаўладкавання прастытутак іх працадаўца павінен прайсці праверку на наяўнасць судзімасці, атрымаць ліцэнзію і працаваць толькі на тэрыторыі Бельгіі. Ён таксама абавязаны паважаць права жанчын адмовіць кліенту і спыніць сэксуальны акт у любы момант.
«У нас у гэтым плане няма праблем, мы і раней працавалі так, як цяпер апісана ў законе. Жанчыны павінны мець магчымасць выбіраць кліентаў», — прызнае Крыс, муж Аляксандры і саўладальнік салона.
Але не варта думаць, што ўсе іншыя гульцы на гэтым рынку такія самыя.
«Такія правілы — далёка не ўсюды. Ёсць жанчыны, якіх прымушаюць прымаць кліентаў. І вось для іх вельмі важна, што дакумент прынялі, — мяркуе Манон, работніца сэкс-бізнэсу з 19 гадоў. — Гэтая праца павінна даваць нам тыя ж правы, што і любая іншая».
Але рэформу вітаюць не ўсе. Некаторыя фемінісцкія асацыяцыі асуджаюць падыход да жанчыны як да тавару, лічачы, што закон ніяк не абараняе іншаземак, што часта робяцца ахвярамі сутэнёраў. Без дазволу на працу яны не могуць працаваць па кантракце.
«Гэта будзе спрыяць сутэнёрам і гандлярам людзьмі, якія і так карыстаюцца велізарнай беспакаранасцю ў Бельгіі», — лічыць Мірэя Крэспа, дырэктарка Isala, асацыяцыі, якая падтрымлівае прастытутак.
Паводле яе слоў, закон негатыўна паўплывае на грамадства ў цэлым, бо праводзіць думку, што жанчына — аб'ект гандлю, хай і добраахвотнага.
З гэтым нязгодныя многія прафесіяналы, уладальнікі салонаў сустрэч.
«Сэкс-праца заўсёды была і ёсць. І калі яна не навідавоку, то працягваецца ў падполлі», — сцвярджае Карын Ван дэр Эльст, уладальніца Villa Tinto ў Антверпене. Гэта — комплекс вітрын, якія пасуткава арандуюць прастытуткі.
Новы закон, такім чынам, выклікае шмат пытанняў. На думку экспертаў, пройдуць гады, перш чым можна будзе ацаніць ягоны ўплыў на ўмовы жыцця сэкс-работнікаў, а таксама на стан сектара гандлю людзьмі і сутэнёрства.
Муж некалькі гадоў здраджваў жонцы і старанна выдаляў кампрамат з айфона. Але макбук усё захаваў
«Ты як раб: проста ідзеш і робіш гэта». Беларусы, якія лічаць сябе сэксаголікамі і цвёрда вырашылі «завязаць», расказалі пра свой досвед
«Паслугі прастытутак і дарагія гадзіннікі». Кіраўнік Міжнароднага саюза біятланістаў быў падкуплены Расіяй
«Даводзім да расслаблення. Адзін раз — 100 рублёў. Два разы — 200». Купрэйчык расказаў пра прастытуцыю ў Мінску
Затрыманая ў Польшчы агентка КДБ раней была порнаактрысай
Цяпер чытаюць
Як купіць кватэру ў Мінску, калі няма каму дапамагчы? Задаецца пытаннем беларус, які адкладае па $1000 у месяц і ўсё адно ў адчаі17
Каментары
амінь