Гендырэктар «Беларуськалія» знайшоў бяспройгрышны спосаб спадабацца Лукашэнку
Кіраўнік найбуйнейшага горназдабываючага прадпрыемства краіны за стырном камбайна прыняў удзел ва ўборачнай кампаніі, на час якой пайшоў у водпуск.
Старшыня Салігорскага райвыканкама Анатоль Ладыга ўручыў гендырэктару «Беларуськалія» Івану Галаватаму грамату за добрасумленную працу падчас уборачнай кампаніі, піша «Спутнік».
Як расказалі на прадпрыемстве, генеральны дырэктар Беларуськалія Іван Галаваты і намеснік генеральнага дырэктара Сяргей Пратасеня з першых дзён жніва — у ААТ «Вырашальны» холдынга «Беларуськалій-Агра».
«Дзелавыя касцюмы змянілі на рабочую вопратку, пасады — на камбайнера і яго памочніка», — расказалі на прадпрыемстве.
У прэс-службе «Беларуськалія» ўдакладнілі, што генеральны дырэктар працаваў на камбайне падчас свайго водпуску. Экіпаж Івана Галаватага мае ў сваім заліку тысячу тон збожжа новага ўраджаю.
Іван Галаваты адзначыў, што апошнія тры гады грунтоўна рыхтаваўся да работы на ўборцы ўраджаю. Спачатку асвоіў трактар, а потым атрымаў правы на кіраванне камбайнам.
«Сёння як паўнацэнны экіпаж працуем у полі. Гэта пачуццё радасці і гонару за родную зямлю, калі бачыш вынік, закладзены шматтысячным калектывам хлебаробаў», — пракаментаваў ён сваю работу.
Анжаліка Мельнікава тыдзень правяла на Шры-Ланцы і вылецела з дзецьмі ў Дубай37
Каментары