«З Парыжа з любоўю» — зубадрабільны напарніцкі баявік з Джонам Траволтам і Джонатанам Рыс Маерcам.
З Парыжа з любоўю (From Paris with Love)
Францыя, 2010, каляровы, 92 хв.
Рэжысёр: П’ер Марэль
Ролі выконваюць: Джонатан Рыс Маерс, Джон Траволта, Эмбер Роуз Сева, Кася Смутняк, Меліса Марс, Рычард Дардэн
Жанр: Напарніцкі баявік
Адзнака: 7 (з 10)
Малады супрацоўнік амерыканскай амбасады ў Парыжы прагне быць шпегам. Герой становіцца памагатым агента Уэкса, любімыя прыёмы якога — стрэлы і ўдар кулаком. Шахмаціст-ціхоня ўцягваецца ў шальныя прыгоды.
Карціна П’ера Марэля, спрадусаваная Люкам Бесонам — зухаваты напарніцкі баявік з бесперапыннай інтрыгай, аўтамабільнымі гонкамі — і нечаканаю куляю ў лоб. Нерв карціны — характары-тыпажы.
Герой Рыса Маерса — сваяк ціхага забойцы-кар’ерыста, сыгранага акторам у «Матч Пойнце».
Бура і ўраган побач — паголены налыса забіяка — Джон Траволта. Былы таранцінаўскі гангстэр з асалодаю вучыць напарніка, які рэфлексуе і сумняецца — правілам перастрэлак. Жарты пры гэтым не выключаюцца.
Разнесеныя ва ўшчэнт манэкіны, ваза з какаінам, горы трупаў (па адным за кожную гадзіну прыгодаў Траволты ў Парыжы).
Кітайска-пакістанскія тэрарысты такой дзейнасцю будуць незадаволеныя.
Затое жанр — чысты. Парыжскі баявік — зубадрабільны, тэстастэронавы і відовішчны.
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм14
Каментары