Зяленскі выступіў з максімальна рэзкім зваротам з нагоды Дня незалежнасці
Назваў Пуціна «хворым дзедам з выцвілымі вачыма» і сказаў, што ўкраінскае праваслаўе вызваляецца ад «маскоўскіх чарцей». Зварот быў запісаны ў Сумскай вобласці, на мяжы з Расіяй.
Прэзідэнт Уладзімір Зяленскі павіншаваў украінцаў з 33-й гадавінай Дня Незалежнасці Украіны.
«Сёння мы адзначаем 33-ы Дзень Незалежнасці Украіны. А тое, што нёс на нашу зямлю вораг, цяпер вярнулася ў яго дом. І той, хто хацеў ператварыць нашы землі ў буферную зону, павінен думаць, каб яго краіна не стала Буфернай Федэрацыяй».
Зяленскі адзначыў, што запісаў свой 13-хвілінны зварот у Сумскай вобласці непадалёк ад мяжы з Расіяй.
«Сумшчына. Магрыца. Рэчка Псел. Некалькі кіламетраў ад нашай мяжы. Мяжы паміж Украінай і няволяй, паміж жыццём і смерцю. Мяжы паміж незалежнай еўрапейскай дзяржавай і тэрарыстычнай арганізацыяй нумар адзін у свеце», — сказаў ён.
Таксама Зяленскі падкрэсліў, што Украіна здзівіла свет, пачаўшы паспяховую ваенную аперацыю ў Курскай вобласці РФ, а расійскія ўлады чарговы раз прадэманстравалі сваю абыякавасць да ўласных грамадзян.
«33 гады таму Украіна адрадзілася на картах свету, а сёння Украіна пакарае сэрцы свету. Натхняе адвагай. Служыць прыкладам, як не баяцца Пуціна. І аб'ядноўвае Зямлю вакол свайго, украінскага светапогляду: у XXI стагоддзі тэрарысты павінны спачываць у Гаазе, а не на Валдаі. І ніхто ў свеце больш не скажа: «Where is Ukraine?» Бо на кожным кантыненце цяпер кажуць: «Ukraine must win». Гэта зараджае нашу незалежнасць. Нашу Украіну», — сказаў ён.
Акрамя таго, Зяленскі падзякаваў усім украінцам і замежнікам, якія абараняюць незалежнасць краіны і паабяцаў, што Расія адкажа за атакі па тэрыторыі Украіны: «Украінцы заўсёды вяртаюць пазыкі. І той, хто зычыў нашай зямлі бяды, атрымае яе ў сябе дома. З працэнтамі. Той, хто хоча сеяць на нашай зямлі зло, будзе пажынаць яго плён на сваёй тэрыторыі. Гэта не прароцтва, не злараднасць, не сляпая помста, гэта — заканамернасць. Справядлівасць. Бумеранг для зла».
Бізнэсовец родам з Бабруйска адмовіцца ад свайго гіганцкага аўстралійскага заробку дзеля шанцу атрымаць $35 мільёнаў3
Каментары