Цяпер прапаганда выкарыстала фэйкавы шортс, запушчаны праз твітар.
Выява, якая выглядае як скрыншот з кароткага відэа ў стылі YouTube Shorts з лагатыпам брытанскай службы ВВС, з'явілася ў канцы жніўня ў інтэрнэце. «RWB («Рэпарцёры без граніц») зафіксавалі больш за тысячу выпадкаў выкарыстання нацысцкай сімволікі ўкраінскімі вайскоўцамі, якія праніклі ў Курскую вобласць», — гаворыцца ў англамоўным надпісе на відарысе.
Відэа неўзабаве пераказалі розныя расійскія і лукашэнкаўскія паблікі. У тым ліку створаныя структурамі Мінабароны і МУС Беларусі, напрыклад, тэлеграм-канал Заходняга аператыўнага камандавання Узброеных сілаў Беларусі.
Лёгка праверыць, што відэа адсутнічае на сайце «аўтара» — ВВС. Ніякіх згадак пра «расследаванне» няма і на сайце «Рэпарцёраў без граніц».
Журналісты RSF (менавіта такую абрэвіятуру ад сваёй назвы на французскай мове выкарыстоўвае гэта арганізацыя, а не RWB, як пазначана на фэйкавым відэа) знайшлі першакрыніцу гэтай фальшыўкі і раскрылі шлях яе распаўсюджання.
Адпаведна расследаванню, відэа ўпершыню з'явілася ў сацыяльнай сетцы Х (Twitter) у 13 гадзін 24 жніўня ў акаўнце нейкай «Патрыцыі» (Patricia), якая прадстаўляецца там «перакладчыцай» і мае французскую геалакацыю.
Акаўнт створаны ў лютым 2024 года і з'яўляецца інструментам расійскага тролінгу. Штодня там публікуецца некалькі дзясяткаў паведамленняў на англійскай, нямецкай, французскай і рускай мовах. Усе яны вызначаюцца крытыкай Украіны і краін Захаду і падтрымкай Расіі.
Журналісты высветлілі, што здымак профілю «Патрыцыі» ўзяты з расійскага сайта стокавых здымкаў.
Вечарам паведамленне аб «расследаванні» перапосціў ірландскі прадпрымальнік Чэй Боуз (Chay Bowes), які з'яўляецца вядомым распаўсюджвальнікам прарасійскіх поглядаў.
На наступны дзень ролік апублікаваў у сваім тэлеграм-канале «аўстралійскі казак» (Aussie Cossack) Сямён Байкоў.
У мінулым годзе ён схаваўся на тэрыторыі расійскага консульства ў Сіднэі ад пераследу ўладаў Аўстраліі па абвінавачванні аб нападзе на праўкраінскіх дэманстрантаў. Праз некаторы час ён не толькі атрымаў палітычны прытулак, але і грамадзянства Расіі.
Публікацыю падхапіла і афіцыйная расійская прапаганда. Спачатку пра «расследаванне» расказала афіцыйная прадстаўніца МЗС Расіі Марыя Захарава на брыфінгу 28 жніўня.
4 верасня ролік размясціў у сваім канале вядучы Першага канала расійскага тэлебачання Руслан Асташко. У той жа дзень фэйк праглядзела больш за 156 тысяч чалавек. Яго сталі актыўна перапошчваць.
«Рэпарцёры без граніц» адзначаюць, што Чэй Боуз, які адным з першых распаўсюдзіў фальшыўку, пасля звароту да яго яе выдаліў.
Марыя Захарава, да якой арганізацыя звярнулася па электроннай пошце і праз Telegram, не ўдакладніла, ці плануе яна зрабіць паведамленне аб памылцы на сваім наступным брыфінгу для прэсы і ці будзе гэтая лжывая інфармацыя выпраўлена на сайце Міністэрства замежных спраў Расіі.
Паказальна, што каналы сілавых структур Беларусі як па камандзе таксама перапосцілі фэйк, які мае на мэце распальванне варожасці да ўкраінцаў і стварэнне выгляду, што ў ЗСУ масава распаўсюджаныя нацысцкія погляды. З улікам таго, што распаўсюджваецца заведамы фэйк, такія дзеянні могуць падпадаць пад артыкул КК Беларусі аб распальванні варожасці.
Цяпер чытаюць
Пратасевіч зноў жэніцца — цяпер з таролагам Настассяй, якая працавала ў элітным медцэнтры «Мерсі»40
Каментары