Балгарыя можа дэпартаваць грамадзяніна Беларусі — прадстаўніка ЛГБТ
Улады Балгарыі адмовілі ў прадастаўленні прытулку грамадзяніну Беларусі, і цяпер яму пагражае дэпартацыя з краіны, піша «Позірк» са спасылкай на Балканскую сетку журналісцкіх расследаванняў BIRN.
Мужчыну завуць Андрэй, прозвішча ў публікацыі не называецца з меркаванняў бяспекі сваякоў, якія знаходзяцца ў Беларусі.
Паводле інфармацыі журналістаў-расследавальнікаў, у атрыманні прытулку беларусу адмовіў 17 верасня Вярхоўны суд у Сафіі, цяпер ён з адвакатамі рыхтуецца абскардзіць рашэнне. Пры гэтым, як паведамляецца, беларус не выключае звароту ў Еўрапейскі суд па правах чалавека
Адзначаецца, што Андрэй знаходзіцца ў шлюбе з расійскім журналістам і апазіцыйным актывістам Аляксеем Бачынскім, які атрымаў прытулак у Балгарыі 25 красавіка. Шлюб быў аформлены ў Капенгагене ў 2014 годзе.
Пара пераехала ў Балгарыю з Расіі ў 2022 годзе пасля вайсковага ўварвання РФ ва Украіну. Выданне паведамляе, што яны «ўдзельнічалі ў актывізме супраць рэжымаў у Расіі і Беларусі і падтрымлівалі праўкраінскія дэманстрацыі ў Расіі, Беларусі і Балгарыі».
Як адзначае BIRN, «у сваім наступным хадайніцтве аб прадастаўленні прытулку Андрэй таксама згадае аб новых рэпрэсіўных законах у Беларусі з красавіка гэтага года, згодна з якімі дэманстрацыя адносін ЛГБТК+ можа лічыцца парнаграфічнай і карацца турэмным зняволеннем».
«Мы спадзяемся, што гэта будзе прынята пад увагу, паколькі гэта новыя абставіны, якія з’явіліся пасля таго, як ён падаў заяву ў першы раз», — цытуе медыя Бачынскага, які доўгі час супрацоўнічае з расійскім апазіцыйным парталам kasparovru.com.
У публікацыі гаворыцца, што Балгарыя, якая «сутыкаецца з праблемамі з-за ўмяшання Расіі», у жніўні гэтага года забараніла «прапаганду нетрадыцыйнай сексуальнай арыентацыі», у прыватнасці, у сувязі з «прысутнасцю тэмы ЛГБТК+ у сістэме адукацыі».
Пры гэтым у дакуменце Бачынскага аб прадастаўленні яму статусу бежанца, з якім азнаёміўся BIRN, ён указаны як чалавек, які не знаходзіцца ў шлюбе.
Адвакат Дзяніца Любенава, якая прадстаўляе мноства спраў аб правах ЛГБТК+ у Балгарыі, паведаміла, што беларус Андрэй будзе дамагацца паскоранага слуханні ў ЕСПЧ, паколькі суд у Сафіі «праігнараваў статус пары, якая законна знаходзіцца ў шлюбе».
Цяпер беларус на волі, аднак, як сцвярджаецца, пара турбуецца пра сваю будучыню, бо балгарскія ўлады і раней прымалі негатыўныя рашэнні ў дачыненні да асоб, якія спрабавалі атрымаць прытулак.
Цяпер чытаюць
Крутога айцішніка, які вярнуўся з Грузіі, асудзілі па чатырох палітычных артыкулах4
Каментары