Ганец з Ірана ехаў папярэдзіць Насралу, што Ізраіль збіраецца таго забіць. Абодва загінулі ў бункеры
Ганца да Насралы адправіў вярхоўны лідар Ірана аятала Хаменеі, бо баяўся карыстацца звычайнай сувяззю з-за магчымасці перахопу паведамленняў з боку Ізраіля, высветліла агенцтва Reuters. Пасланнікам аказаўся высокапастаўлены іранскі генерал.
За некалькі дзён да гібелі лідара «Хезбалы» Хасана Насралы ў выніку ізраільскага ўдару вярхоўны лідар Ірана аятала Алі Хаменеі адправіў да таго ганца з заклікам тэрмінова пакінуць Ліван. Звычайнай сувяззю было вырашана не карыстацца праз рызыку перахопу з боку Ізраіля і гісторыю з масавымі выбухамі пэйджараў у Ліване.
Пра гэта паведамляе агенцтва Reuters са спасылкай на трох высокапастаўленых іранскіх крыніц.
Ганцом аказаўся іранскі генерал-маёр Корпуса вартавых ісламскай рэвалюцыі Абас Нілфурушан. Ён быў павінен папярэдзіць Насралу аб наяўнасці ў ягоным атачэнні агентаў Масада, якія збіраюцца яго забіць. У выніку і Нілфурушан, і Насрала загінулі ў бункеры падчас бомбавай атакі Ізраіля на Бейрут, заявілі іранскія крыніцы.
Па іх словах, пасля забіцця Насралы аятала Хаменеі стаў глыбока занепакоены магчымым пранікненнем Ізраіля ў высокапастаўленыя ўрадавыя колы ў Тэгеране, таму быў пераведзены ў бяспечнае месца.
Цяпер чытаюць
На перадсмяротным відэа з калоніі насамрэч быў не Вітольд Ашурак. З'явіліся новыя падрабязнасці смерці палітвязня28
Каментары