Легенду Веткаўскага музея, вядомага краязнаўцу асудзілі ў Гомелі — вырак выносіў былы следчы
Былы супрацоўнік Веткаўскага музея стараабрадніцтва і беларускіх традыцый імя Шклярава, экскурсавод Аляксандр Нікіцін быў асуджаны да пазбаўлення волі па абвінавачванні ва ўдзеле ў пратэстах, піша «Флагшток».
Паводле «Вясны», Аляксандра асудзілі ў канцы верасня па ч. 1 арт. 342 КК (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). Прысуд выносіў Дзяніс Кузенек, які стаў суддзём літаральна некалькі месяцаў таму. Прынамсі, у канцы траўня 2024 года Кузенек быў яшчэ стажорам суддзі.
Да гэтага ён шмат гадоў працаваў следчым. Паводле згадак у дзяржаўнай прэсе, у 2017 годзе Кузенек быў начальнікам Гомельскага раённага аддзела Следчага камітэту, а як мінімум да пачатку 2023 года займаў пасаду начальніка Рэчыцкага РАСК, быў палкоўнікам юстыцыі. Відавочна, палітычная справа стала адной з першых, якую былы следчы вёў ужо ў якасці суддзі.
Дакладны тэрмін, які ён прысудзіў Нікіціну, пакуль не называецца. Вядома, што да гэтага хлопца судзілі па адміністрацыйным артыкуле за падпіску на старонку, абвешчаную «экстрэмісцкай». Гэта адбылося ў пачатку мая. З таго часу старонкі Аляксандра ў сацсетках не аднаўляюцца.
Верагодна, спачатку хлопца затрымалі за «падпіскі», а пры праверцы тэлефона маглі знайсці здымкі з пратэстаў 2020 года, за што ўрэшце завялі крымінальную справу.
Аляксандра называлі «легендай Веткаўскага музея», «любімым экскурсаводам». Ён захапляўся краязнаўствам яшчэ з юнацтва, любіў бываць у экспедыцыях і збіраць старадаўнія рэчы. Некаторыя нават выкупляў за ўласныя грошы.
Апошні час Аляксандр не працаваў у музеі. Яго забралі ў войска ў канцы 2022 года, а пасля таго, як ён адслужыў, у музей не вяртаўся. Па звестках Флагштока, незадоўга да затрымання хлопец паспеў папрацаваць на дзяржаўным тэлебачанні. Да гэтага ён не раз даваў каментары дзяржаўнай прэсе.
Цяпер чытаюць
Колькасць судоў па палітычных крыміналках зменшылася ў разы24
Каментары