Толькі адзін голас, але за тры краіны. «Еўрабачанне» хоча змяніць правілы, каб у галасаванні было менш палітыкі
Цяпер тэлегледачы маюць права галасаваць за ўпадабанага ім выканаўцу да 10 разоў — і могуць рабіць гэта анлайн, па тэлефоне або пры дапамозе тэкставага паведамлення. Прапануецца гэта змяніць.
Арганізатары песеннага конкурсу «Еўрабачанне» прапануюць кардынальна змяніць правілы галасавання, каб тыя ці іншыя краіны атрымлівалі менш магчымасцяў уплываць на вынікі, піша Бі-бі-сі.
Цяпер тэлегледачы маюць права галасаваць за ўпадабанага ім выканаўцу да 10 разоў — і могуць рабіць гэта анлайн, па тэлефоне або пры дапамозе тэкставага паведамлення.
Але, як паведамляецца, Еўрапейскі вяшчальны саюз (EBU) накіраваў ліст тэлекампаніям, якія ўдзельнічаюць у конкурсе, з прапановай радыкальных рэформаў: галасаваць толькі анлайн і выбіраць не аднаго, а адразу трох любімых выканаўцаў. Аддаць голас пры гэтым можна будзе толькі адзін раз.
EBU заявіў, што галасаванне з палітычных матываў стала «звычайнай з’явай», і многія лічаць такую практыку «глыбока трывожнай». Дыскусіі аб правілах галасавання працягваюцца пасля таго, як у 2025 годзе ўрад Ізраіля заклікаў фанатаў некалькі разоў аддаваць галасы за ўдзельніцу ад гэтай краіны.
Песня Юваль Рафаэль New Day Will Rise («Наступіць новы дзень») заняла 15‑е месца па выніках галасавання членаў прафесійных журы, але стала безумоўным лідарам сярод гледачоў, атрымаўшы 297 балаў. У выніку Рафаэль заняла на конкурсе другое месца.
Пасля гэтага некалькі вяшчальных кампаній пачалі задаваць пытанні, якім чынам Ізраілю ўдалося заняць настолькі высокае месца. Пры гэтым яны звярнулі ўвагу, што афіцыйныя акаўнты ў сацыяльных сетках, звязаныя з ізраільскімі ўладамі (у тым ліку з прэм’ер-міністрам Біньямінам Нетаньяху), заклікалі галасаваць за Рафаэль 20 разоў — максімальна дазволеную колькасць.
У выніку EBU вырашыў змяніць умовы конкурсу 2026 года: тады галасаваць дазвалялася не больш за 10 разоў.
Еўрапейскі вяшчальны саюз быў вымушаны вынесці афіцыйнае папярэджанне ізраільскаму вяшчальніку Kan, паколькі ўдзельніца «Еўрабачання» ў сваіх сацыяльных сетках заклікала фанатаў «галасаваць за Ізраіль 10 разоў».
«Еўрабачанне» заявіла, што такія пасты супярэчылі «духу спаборніцтва», і распарадзілася іх выдаліць.
Новыя правілы, прапанаваныя EBU, павінны пакласці канец практыцы галасавання за адну і тую ж краіну некалькі разоў.
Аднак фанаты ўсё ж змогуць рабіць гэта, калі зарэгіструюць на сайце конкурсу розныя акаўнты — з выкарыстаннем розных спосабаў аплаты.
«Мы лічым, што гэтыя змены дапамогуць знізіць уплыў мабілізацыі галасоў, але захаваць прынцыпы даверу і справядлівасці», — гаворыцца ў лісце EBU, змест якога ўпершыню апублікавала шведская газета Aftonbladet.
Еўрапейскі вяшчальны саюз заявіў Бі-бі-сі: «Мы можам пацвердзіць, што пачалі вывучаць магчымасць поўнага пераходу на анлайн-галасаванне ў песенным конкурсе «Еўрабачанне» і паведамім больш падрабязнасцяў у бліжэйшыя месяцы».
У сваім лісце EBU прызнаў, што цяперашняя сістэма галасавання ўплывае на стаўленне гледачоў да конкурсу.
«Нават пры адсутнасці маштабных платных кампаній і ва ўмовах сістэмы галасавання, за якую мы не можам цалкам паручыцца, стала відавочна, што цяперашні геапалітычны клімат прыносіць галасы некаторым выканаўцам па прычынах, вельмі мала звязаных з іх выступленнямі», — гаворыцца ў дакуменце.
«У гісторыі «Еўрабачання» падобныя прэцэдэнты ўжо здараліся, мы бачылі такое неаднаразова, але цяпер гэта робіцца паслядоўна і выклікае ў многіх глыбокую занепакоенасць, — адзначае EBU ў сваім лісце. — Наш аналіз дазваляе прапанаваць дзве змены: поўны перанос галасавання ў анлайн і ўвядзенне патрабавання галасаваць больш чым за аднаго выканаўцу, напрыклад, за трох фаварытаў».
Ліст падпісалі дырэктар Еўрапейскага вяшчальнага саюза Жан Філіп дэ Тэндэр і старшыня аргкамітэта «Еўрабачання» Ана Марыя Бордас.
Арганізатары прапануюць цалкам перанесці галасаванне ў анлайн, паколькі фанатам будзе тэхнічна складана галасаваць адразу за некалькіх выканаўцаў па тэлефоне або пры дапамозе тэкставых паведамленняў.
Пачынаючы з конкурсу гэтага года, у Вялікабрытаніі ўжо дзейнічаюць правілы, паводле якіх галасаваць за ўдзельнікаў конкурсу можна толькі анлайн.
Беларусь не ўдзельнічае ў Еўрабачанні з 2020 года. У тым годзе конкурс быў адменены для ўсіх з-за кавіду, у 2021 годзе з конкурсу была знятая група «Галасы з месца» з-за палітычнага падтэксту абранай песні, а Еўрапейскі вяшчальны саюз аб’явіў аб пазбаўленні членства Белтэлерадыёкампаніі ў арганізацыі з-за пытанняў парушэння правоў чалавека ў краіне на фоне пераследу апазіцыі.
«У пашпарце бабулі стаіць дата нараджэння 00.00.1945» — «А ў маёй XX.XX.1940». Як такое можа быць?2
Каментары