Імя Мухамед стала самым папулярным у Вялікабрытаніі? Так, але вы робіце з гэтага памылковыя высновы
Падобная сітуацыя і ў многіх рэгіёнах суседняй Расіі.
Па інфармацыі Нацыянальнай статыстычнай службы Вялікабрытаніі, у 2023 годзе імя Мухамед (Muhammad) упершыню стала самым папулярным іменем для хлопчыкаў у Англіі і Уэльсе. 4661 хлопчыка назвалі менавіта так.
Традыцыйнае для жыхароў краіны імя Ной (Noah) адкацілася на другое месца (4382 дзіця). Услед па папулярнасці ідуць Олівер, Георг, Лео.
З першага погляду такі факт можа быць успрыняты як сведчанне імклівага росту мусульманскай супольнасці Вялікабрытаніі. Падаецца, што пры быццам бы нязначнай долі насельніцтва (па інфармацыі на 2021 год, гэта 6,7%), мусульмане нараджаюць больш за ўсіх астатніх, разам узятых. У выніку распаўсюджваецца міф аб «панаехаўшых», які селі на шыю мясцовым.
Насамрэч статыстыка імён нічога не гаворыць аб павышанай нараджальнасці ў мусульманскай супольнасці Вялікабрытаніі. Калі зірнуць на спіс са ста самых папулярных імёнаў хлопчыкаў, то ў ім знаходзіцца толькі чатыры тыповыя ісламскія імёны. Гэта Юсуф (79-я пазіцыя), Ібрагім (83-я пазіцыя), Муса (85-я), а таксама вышэйзгаданы Мухамед у розных варыяцыях (Muhammad — 1-я пазіцыя, Mohammed — 28-я, Mohammad — 68-я).
Гэтымі імёнамі ў суме ў 2023 годзе названы 8979 дзяцей мужчынскага полу. Усяго ж імёны з першай сотні атрымалі 153 218 хлопчыкаў.
Няцяжка падлічыць, што немаўлятаў з тыпова мусульманскімі імёнамі сярод іх усяго 5,86 %. І гэта трохі менш за долю, якую складае мусульманская абшчына ў Вялікабрытаніі.
Гэта не адмяняе таго факту, што імя Мухамед набірае папулярнасць. Як адзначае выданне Daily Mail, яго ў розным напісанні атрымаў кожны 40-вы народжаны хлопчык ці 2,6% ад агульнай колькасць. Гэтая лічба самая вялікая за ўсю гісторыю. У першую чаргу гэта абумоўлена самым нізкім паказчыкам нараджальнасці ў Вялікабрытаніі з 1977 года.
Выданне нагадвае, што варыянт напісання Mohammed увайшоў у сотню найбольш папулярных імён Вялікабрытаніі яшчэ ў 1924 годзе. Яго папулярнасць значна знізілася перад пачаткам і ў гады Другой сусветнай вайны і зноў стала расці толькі ў 1960-я гады.
Зрэшты, імя Мухамед можна лічыць самым папулярным іменем у свеце, калі скласці формы Mohammed, Muhammad, Mohamed і Mohammad. Гэта абумоўлена тым, што ў мусульманскай традыцыі імем прарока ісламу прынята называць першае дзіця мужчынскага полу. У іншых рэлігіях такой прыхільнасці да нейкага асобнага імені няма.
Неразуменне гэтай спецыфікі абурае і многіх расіян, калі яны бачаць статыстыку папулярнасці імёнаў у розных рэгіёнах краіны.
Мухамад лідзіруе з вялікім адрывам у мусульманскіх Чачні, Дагестане, Карачаева-Чаркесіі, Кабардзіна-Балкарыі, Інгушэціі, а апошнія гады выбілася на першае месца і ў Ханты-Мансійскай аўтаномнай акрузе.
Зрэшты, і ў Маскве Мухамад набірае папулярнасць і ўжо забраўся на 14-е месца. Аднак іншых «мусульманскіх» імёнаў у гарадскім топе няма, бацькі спыняюцца менавіта на гэтым імені.
Каментары