Шпакоўскі даў зразумець, што знакавых палітвязняў могуць вызваліць пры ўмове выезду за мяжу
Прапагандыст Аляксандр Шпакоўскі адрэагаваў на рэзанансны артыкул The New York Times. У ім гаварылася, што ЗША рыхтуюць здзелку з Лукашэнкам: вызваленне палітвязняў у абмен на санкцыі на калій і банкі.
Вызваленне Аляксандрам Лукашэнкам грамадзяніна ЗША і двух беларускіх палітвязняў можа стаць першым крокам да маштабнай угоды паміж Вашынгтонам і Мінскам. Пра гэта, сенсанцыйна паведаміла The New York Times, распавёў намеснік памочніка дзяржсакратара ЗША ў Еўропе Крыс Сміт на сустрэчы дыпламатаў у Вільні.
ЗША такім чынам нібыта нацэленыя на забеспячэнне дыстанцыявання Беларусі ад Расіі.
Шпакоўскі звяртае ўвагу, што беларускі бок на афіцыйным узроўні захоўвае маўчанне, амерыканцы таксама не каментуюць апублікаваную інфармацыю.
Шпакоўскі мяркуе, што зліў інфармацыі пра перамовы амерыканцаў з Лукашэнкам выданню маглі зрабіць еўрапейскія дыпламаты, «пераследуючы ўласныя мэты».
«Калі спасылацца на артыкул The New York Times, то атрымліваецца, што ў Вільні амерыканскі эмісар Сміт правёў закрытую сустрэчу з нейкімі «заходнімі» дыпламатамі, якія і выступілі ў якасці крыніц газеты».
Шпакоўскі разважае, што хаця «Беларусь не гандлюе саюзнікамі», але «цяпер ідзе глабальны перамоўны працэс».
«Задача кіраўніка дзяржавы, дыпламатаў, спецслужбаў на знешнім контуры заключаецца ва ўсебаковай абароне і забеспячэнні нацыянальных інтарэсаў. Гэта аксіёма», — піша прапагандыст.
Афіцыйны Мінск, паводле яго слоў, з першага дня вайны ва Украіне заяўляў, што мае намер «у тым ці іншым фармаце ўдзельнічаць у камунікацыі ў пытаннях мірнага ўрэгулявання, каб купіраваць пагрозы бяспекі нашай краіны, якія зыходзяць ад развязанай супраць Беларусі эканамічнай агрэсіі з прычыны нібыта «саўдзелу» ў вайне», — заяўляе Шпакоўскі.
Ён апелюе да Пуціна, які заявіў, «каментуючы гатоўнасць Масквы да перамоваў з Захадам, што «палітыка — мастацтва кампрамісу».
Шпакоўскі піша, што пасля перамогі амерыканскіх правых Беларусь і Расія больш змогуць заяўляць, што яны — «бастыён веры, каштоўнасцяў і традыцыяналізму».
«Наступаць будуць маладыя, жорсткія, эфектыўныя хлопцы. Такія як Джэй Дзі Вэнс. З лозунгамі «вызвалення ад бальшавізму».
Шпакоўскі дадае, што рэжыму нічога не пагражае, калі грамадства будзе згуртавана — зразумела, вакол Лукашэнкі.
«І ў такой сітуацыі па вялікім рахунку якая розніца, дзе (у турме ці за мяжой) будзе знаходзіцца той ці іншы персанаж беларускай смуты 2020 года? Таму сітуацыя ў развіцці», — піша ён пра магчымы лёс знакавых палітвязняў.
Джэфры Эпштэйн некалькі разоў атрымліваў візу ў Беларусь. І дакладна наведваў нашую краіну7
Каментары