Буракі — адзін з самых карысных відаў гародніны. Яны дапамагаюць змагацца з анеміяй, умацоўваюць імунітэт, зніжаюць узровень дрэннага халестэрыну і нават абараняюць ад размнажэння ракавых клетак. Акрамя традыцыйных вінегрэту, баршчу і селядца пад шубай прапануем вам прыгатаваць з буракоў нешта асаблівае.
Каб прыгатаваць карпача з буракоў, спатрэбіцца:
- 2 вялікія буракі,
- сушаны размарын — 1 чайная лыжка,
- сушаны чабор — 1 чайная лыжка,
- марская соль — 1 чайная лыжка,
- рукала — 250 грамаў,
- чорныя аліўкі — 100 грамаў,
- каперсы — 60 грамаў,
- сыр фета — 150 грамаў,
- часночная салатная закраса,
- алей, найлепш аліўкавы — 80 мл + 3 ст. л.,
- вада — 3 ст. л.,
- сок аднаго лімона — мілілітраў 50
1. Вымыйце буракі, высушыце, апырскайце алеем (80 мл), пасыпце размарынам, чабаром і марской соллю.
2. Загарніце буракі са спецыямі і алеем у алюмініевую фольгу і запякайце ў папярэдне разагрэтай духоўцы пры 190 градусах 90 хвілін.
3. Па заканчэнні гэтага часу астудзіце буракі і нарэжце іх тонкімі лустачкамі.
4. Пакуль буракі запякаюцца, вымыйце рукалу, нарэжце аліўкі, каперсы і раскрышыце сыр фета.
5. Змяшайце часночную салатную запраўку з трыма сталовымі лыжкамі алею, вадой і лімонным сокам.
6. Выкладзіце лустачкі буракоў адну за адной на плоскую талерку, зверху пакладзіце аліўкі, каперсы, рукалу і сыр фета. Паліце прыгатаваным соусам.
Яшчэ адна варыяцыя з падобных прадуктаў, але іншым смакавым акцэнтам — салата з бурака і сыру фета — ідэальны баланс салодкага і салёнага.
Каментары
Занатую, трэ будзе закаштаваць гэта блюда, абавязкова, як вярнуся.