Ва ўсіх ВНУ Беларусі з наступнага года пачнуць вывучаць штучны інтэлект
Ва ўсіх універсітэтах Беларусі з наступнага навучальнага года з'явіцца дысцыпліна «Асновы выкарыстання тэхналогіі штучнага інтэлекту», паведаміў міністр адукацыі Андрэй Іванец.
«З наступнага года ва ўсіх універсітэтах у нас з'явіцца адпаведны новы курс — дысцыпліна «Асновы выкарыстання тэхналогіі штучнага інтэлекту», якая будзе распрацаваная ў кантэксце канкрэтнай спецыяльнасці пад канкрэтнага спецыяліста», — заявіў Андрэй Іванец.
Міністр адукацыі заявіў, што ШІ і нейрасеткі ўжо ўкараняюцца ў робататэхніцы і IT, а таксама пры падрыхтоўцы новых інжынерных кадраў. Іванец таксама дадаў, што ў нагу з часам ідуць і школы, дзе вучняў вучаць кіраваць дронамі і наземнымі сродкамі беспілотных сістэм.
«Якія прымяняюцца ў шырокім сэнсе гэтага слова — пачынаючы ад сельскай і лясной гаспадаркі, экалогіі і абароны навакольнага асяроддзя, заканчваючы бяспекай і абараназдольнасцю нашай краіны. Безумоўна, мы гэта ўсё актыўна ўкараняем са школьнай лавы», — цытуе Іванца БелТА.
Раней паведамлялася, што ў 2025 годзе ў БДУ адкрыецца набор на спецыяльнасць «Інтэлектуальная электроніка», навучацца якой можна будзе на факультэце радыёфізікі і камп'ютарных тэхналогій. 25 чалавек змогуць паступіць на бюджэт, яшчэ некалькі — на платнае аддзяленне. Вучыцца па гэтай спецыяльнасці студэнты будуць чатыры гады. Выпускнікі атрымаюць патройную кваліфікацыю «радыёфізік — інжынер — праграміст».
Таксама ў 2024 годзе ў МДЛУ быў адкрыты прыём на спецыяльнасць «Лічбавая лінгвістыка». Выпускнікі будуць спалучаць у сабе кампетэнцыі мовазнаўца і праграміста і змогуць навучаць сістэмы ШІ.
Цяпер чытаюць
Гістарычныя +40,4°C у Пінску — гэта толькі разагрэў. Беларусь уваходзіць у новую кліматычную эру і на вачах стане лесастэпам14
Каментары