Дзявочнік у космасе. Заснавальнік Amazon Джэф Безас адпраўляе нявесту ў космас
Заснавальнік кампаніі Amazon, уладальнік аэракасмічнай кампаніі Blue Origin 61-гадовы мільярдэр Джэф Безас вырашыў адправіць сваю нявесту Лорэн Санчэс у космас.
Лорэн Санчэс рыхтуецца да палёту ў космас у складзе першага цалкам жаночага экіпажа Blue Origin (пасля Валянціны Церашковай).
14 красавіка кампанія Blue Origin, заснаваная Джефам Безасам, плануе ажыццявіць 11-ы пілатаваны палёт на ракеце New Shepard. Гэтым разам у космас адправіцца выключна жаночы экіпаж, у склад якога ўвойдуць журналістка і нявеста Безаса Лорэн Санчэс, спявачка Кэці Пэры, тэлевядучая Гэйл Кінг, інжынерка NASA Айша Боу, праваабаронца Аманда Нгуен і кінапрадзюсарка Кэрыэн Флін.
Палёт працягнецца 11 хвілін і будзе цалкам аўтаматызаваны. Пасля перасячэння лініі Кармана (100 км над узроўнем мора) удзельніцы змогуць адчуць стан бязважкасці і палюбавацца Зямлёй з космасу.
Лорэн Санчэс, якая мае ліцэнзію пілота, узначальвае падрыхтоўку місіі і асабіста падбірала склад экіпажа.
Кэці Пэры прызналася, што марыла пра палёт у космас амаль 20 гадоў і была ў захапленні, калі атрымала запрашэнне. Яе першай думкай было: «Што мне надзець?» — пажартавала спявачка.
Гэйл Кінг спачатку адмовілася ад удзелу, але пасля размовы з тымі, хто ўжо лётаў у космас, змяніла сваё рашэнне. Яна адзначыла, што пераадоленне страху можа стаць прыкладам для іншых.
Айша Боу, якая раней працавала інжынерам у NASA, падкрэсліла, што гэты палёт — ажыццяўленне яе даўняй мары. Аманда Нгуен, актывістка і праваабаронца, бачыць у місіі магчымасць прыцягнуць увагу да гендарнай роўнасці ў навуцы і тэхналогіях.
Гэтая місія стане першай з 1963 года, калі ў космас адправіцца выключна жаночы экіпаж. Удзельніцы спадзяюцца, што іх палёт натхніць дзяўчат і жанчын ва ўсім свеце імкнуцца да зорак.
Чакаецца, што вяселле Безаса і Санчэс адбудзецца ў чэрвені.
Цяпер чытаюць
«Я сказаў на відэа, што мяне не катуюць — на той момант гэта было праўдай. А праз дзве гадзіны мяне збілі». Украінскі журналіст два гады правёў у расійскім палоне — вось што ён перажыў11
Каментары