Dziavočnik u kosmasie. Zasnavalnik Amazon Džef Biezas adpraŭlaje niaviestu ŭ kosmas
Zasnavalnik kampanii Amazon, uładalnik aerakaśmičnaj kampanii Blue Origin 61-hadovy miljarder Džef Biezas vyrašyŭ adpravić svaju niaviestu Łoren Sančes u kosmas.
Łoren Sančes rychtujecca da palotu ŭ kosmas u składzie pieršaha całkam žanočaha ekipaža Blue Origin (paśla Valanciny Cieraškovaj).
14 krasavika kampanija Blue Origin, zasnavanaja Džiefam Biezasam, płanuje ažyćciavić 11-y piłatavany palot na rakiecie New Shepard. Hetym razam u kosmas adpravicca vyklučna žanočy ekipaž, u skład jakoha ŭvojduć žurnalistka i niaviesta Biezasa Łoren Sančes, śpiavačka Keci Pery, televiadučaja Hejł Kinh, inžynierka NASA Ajša Bou, pravaabaronca Amanda Nhujen i kinapradziusarka Keryen Flin.
Palot praciahniecca 11 chvilin i budzie całkam aŭtamatyzavany. Paśla pierasiačeńnia linii Karmana (100 km nad uzroŭniem mora) udzielnicy zmohuć adčuć stan biazvažkaści i palubavacca Ziamloj z kosmasu.
Łoren Sančes, jakaja maje licenziju piłota, uznačalvaje padrychtoŭku misii i asabista padbirała skład ekipaža.
Keci Pery pryznałasia, što maryła pra palot u kosmas amal 20 hadoŭ i była ŭ zachapleńni, kali atrymała zaprašeńnie. Jaje pieršaj dumkaj było: «Što mnie nadzieć?» — pažartavała śpiavačka.
Hejł Kinh spačatku admoviłasia ad udziełu, ale paśla razmovy z tymi, chto ŭžo lotaŭ u kosmas, źmianiła svajo rašeńnie. Jana adznačyła, što pieraadoleńnie strachu moža stać prykładam dla inšych.
Ajša Bou, jakaja raniej pracavała inžynieram u NASA, padkreśliła, što hety palot — ažyćciaŭleńnie jaje daŭniaj mary. Amanda Nhujen, aktyvistka i pravaabaronca, bačyć u misii mahčymaść pryciahnuć uvahu da hiendarnaj roŭnaści ŭ navucy i technałohijach.
Hetaja misija stanie pieršaj z 1963 hoda, kali ŭ kosmas adpravicca vyklučna žanočy ekipaž. Udzielnicy spadziajucca, što ich palot natchnić dziaŭčat i žančyn va ŭsim śviecie imknucca da zorak.
Čakajecca, što viasielle Biezasa i Sančes adbudziecca ŭ červieni.
Ciapier čytajuć
U Drazdach vystavili na prodaž katedž z rekordnaj canoj — $7,5 miljona ŠMAT FOTA2
Kamientary