Працавала з КДБ праз іншага беларуса і ўжо служыла ў Мінабароны Украіны. Новыя дэталі ў справе Іны Кардаш

Затрымлівалі як вайсковую

Як паведаміла «Свабодзе» інфармаваная крыніца ў праваахоўных органах, Іну Кардаш затрымалі 21 студзеня. Папярэдне рашэннем суду яе арыштавалі да 20 сакавіка ўключна.

Калі да гэтага моманту дасудовае расследаванне не завершаць, то суд кожныя два месяцы павінен працягваць яе ўтрыманне пад вартай. Аналагічнае рашэнне патрэбнае на час судовага разгляду справы.

У матэрыялах справы адзначаецца, што Іна Кардаш мае вышэйшую адукацыю і жыла ў зарэгістраваным шлюбе. На момант арышту яна была вайсковай у званні салдата (ва Украіне пасля вайсковай рэформы «салдат» з'яўляецца адным з званняў у шараговым складзе. — РС).

Як высветлілася, у лістападзе 2025 году Іну Кардаш узялі на працу ў Каардынацыйны штаб у пытаннях абыходжання з ваеннапалоннымі Галоўнага ўпраўлення выведкі Міністэрства абароны Украіны.

Справу супраць яе завялі яшчэ летась

Справу супраць Іны Кардаш завялі 16 ліпеня 2025 году. Да таго моманту следчыя ўжо ажыццяўлялі за ёй негалоснае назіранне, а падазрэнне ў шпіянажы на карысць Камітэту дзяржбяспекі Беларусі ўручылі толькі ў дзень затрымання — сёлета 21 студзеня.

На судзе, калі разглядалася хадайніцтва пракурора аб арышце, затрыманая і яе адвакат заявілі аб неабгрунтаванасці падазрэнняў і адсутнасці рызыкаў, што яна будзе хавацца ад следства або іншым шляхам перашкаджаць следству. Але суд падтрымаў пазіцыю абвінавачання.

Справу Іны Кардаш расследуе Галоўнае следчае ўпраўленне Службы бяспекі Украіны.

Апошнія інструкцыі з КДБ атрымлівала ў Венгрыі

Згодна з матэрыяламі следства, Іна Кардаш супрацоўнічала з КДБ з 2019 года.

Следчыя сцвярджаюць, што свае кантакты з КДБ яна ажыццяўляла праз грамадзяніна Беларусі, які «свядома для яе ажыццяўляў канфідэнцыяльную супрацу са спецслужбамі Беларусі».

Гэты беларус, з якім яна размаўляла не пазней за 6 верасня 2025 году, прапанаваў ёй выехаць у Будапешт (Венгрыя), каб там атрымаць неабходныя інструкцыі.

У Будапешт яна прыехала 16 верасня, набыла там новы мабільны тэлефон і нібыта ўсталявала «прыкладанне для зашыфраваных канфідэнцыйных размоў». Потым патэлефанавала беларусу, а той падлучыў да іх размовы супрацоўніка КДБ Беларусі.

У часе гэтай сустрэчы Кардаш нібыта атрымала заданне ўладкавацца на працу ў Каардынацыйны штаб у пытаннях абыходжання з ваеннапалоннымі.

Якую інфармацыю перадавала ў КДБ

Як вынікае з матэрыялаў справы, на працу ў штаб яе ўзялі ўжо ў лістападзе. У дакументах адзначаецца, што сама меней з 21 лістапада да 19 снежня яна «сістэмна збірала службовую інфармацыю» — фатаграфавала дакументы і запісвала размовы іншых супрацоўнікаў штабу, запісы якіх потым перадавала ў Беларусь.

У СБУ, калі паведамілі аб затрыманні Іны Кардаш, сцвярджалі, што ёй наўмысна падкідвалі інфармацыю з грыфам «Таемна», якая насамрэч была выгаднай і не мела статусу сакрэтнай.

• 0
• 0
• 2
• 9
• 0
• 1
• 0
• 0