Работнікі лясной гаспадаркі, якія працуюць у сельскай мясцовасці, могуць атрымаць магчымасць прыватызаваць арэнднае жыллё. З такой ініцыятывай выступіў кіраўнік Міністэрства лясной гаспадаркі Аляксандр Кулік, звярнуўшыся з такой просьбай да Аляксандра Лукашэнкі падчас ягонай працоўнай паездкі ў Аршанскі раён.
Кулік прапанаваў, каб даць супрацоўнікам лясгасаў, якія жывуць у арэндных кватэрах і дамах, размешчаных у аграгарадках і вёсках, права выкупу гэтага жылля пасля дзесяці гадоў бездакорнай працы. Лукашэнка падтрымаў гэтую ініцыятыву пры ўмове, што такія дамы будуць прадавацца «за тыя грошы, за якія пабудавалі».
Аналагічная магчымасць ужо існуе для работнікаў сельскай гаспадаркі. Пасля выдання адпаведнага ўказа Лукашэнкі такое ж права будзе распаўсюджана і на работнікаў лясной галіны.
Увогуле ж, выступаючы на сваёй пашпартнай радзіме ў гарадскім пасёлку Копысь Аршанскага раёна, Лукашэнка які ўжо раз за дзясяткі гадоў свайго кіравання зрабіў акцэнт на неабходнасці развіваць жыллё ў малых населеных пунктах.
Паводле яго слоў, будаваць трэба перш за ўсё там, дзе ёсць працоўныя месцы і запыт ад прадпрыемстваў. Туды, маўляў, людзі захочуць самі пераехаць.
«Наогул нам трэба сур'ёзна перабудавацца — і ў вобласці, ва ўсіх абласцях, і ў краіне — і будаваць толькі на замову жыллё. А людзі што хочуць, тое будуюць — за свой кошт. Мы перашкаджаць ім не павінны, тым больш у такіх пасёлках», — заявіў Лукашэнка.
Таксама Лукашэнка запатрабаваў спыніць «бяздумную будоўлю» ў буйных гарадах і засяродзіцца на малых пасёлках:
«Як толькі абмяжуем будаўніцтва жылля ў Мінску і абласных цэнтрах — людзі прыедуць сюды».
Каментары