У Румыніі зноў праходзяць прэзідэнцкія выбары. Першая спроба не ўдалася з-за падазрэнняў аб расійскім умяшанні
4 траўня ў Румыніі праходзіць першы тур прэзідэнцкіх выбараў. Гэта другая спроба краіны абраць прэзідэнта, пасля таго як у лістападзе мінулага года Канстытуцыйны суд адмяніў вынікі гонкі, у якой перамагаў прарасійскі кандыдат Кэлін Джарджэску.
Улады Румыніі сцвярджаюць, што маюць разведдадзеныя, якія пацвярджаюць умяшанне замежных дзяржаў, у прыватнасці Расіі, у ход папярэдніх выбараў.
Румынская разведка заявіла, што краіна з'яўляецца аб'ектам «агрэсіўных» гібрыдных дзеянняў Расіі, у тым ліку кібератакі, уцечкі інфармацыі і дыверсіі.
На гэты раз у выбарах удзельнічаюць 11 зарэгістраваных кандыдатаў (чацвёра незалежныя). Мінулым разам прэтэндэнтаў на прэзідэнцкую пасаду было 13.
У адсутнасць Кэліна Джарджэску, прэзідэнцкія выбары 4 траўня набылі тыповы для Еўропы характар.
Апытанні грамадскай думкі ставяць на першае месцы Джорджэ Сіміёна, старшыню правага і нацыяналістычнага Альянса за яднанне румынаў (Alianța pentru Unirea Românilor).
38-гадовы Сіміён, які адносна нядаўна з'явіўся на палітычнай арэне, выступае за аб'яднанне Румыніі і Малдовы. У астатнім ягоныя палітычныя погляды блізкія да тых, якіх трымаюцца Джорджа Мелоні і «Альтэрнатыва для Германіі». Тэмай ягонай магістарскай працы былі «Злачынствы камуністычнага рэжыму».
За выхад у другі тур змагаюцца таксама два правацэнтрыскія кандыдаты. Гэта Крын Антанеску і Нікушор Дан.
Кансерватара Антанеску падтрымлівае ўрадавая кааліцыя, што складаецца з левацэнтрыстаў сацыял-дэмакратаў, правацэнтрыстаў з кансерватыўнай Нацыянал-ліберальнай партыі (НЛП) і партыі венгерскай нацыянальнай меншасці. 65-гадовы Антанеску раней уваходзіў у НЛП і быў спікерам Сената, ён правераная фігура на румынскім палітычным полі.
55-гадовы Дан — прымар, гэта значыць мэр сталіцы краіны, Бухарэста. Дан раней узначальваў ліберальны Саюз за ўратаванне Румыніі (СУР), аднак на выбары ідзе як незалежны і антымэйнстрымавы кандыдат.
Каментары