«А Света то не рада!». У публікацыі пра Ціханоўскага адправілі мірыяды ботаў і распаўсюдзілі дыпфэйк
Сталі яўнымі ўстаноўкі, якія праводзяць каментатары-боты ў тыктоках, ютубе ды іншых сацсетках пад навінамі пра вызваленне Сяргея Ціханоўскага.
Вызваленне Сяргея Ціханоўскага беларуская прапаганда падае не толькі як частку вялікай гульні Лукашэнкі з Захадам, але і як стратэгічны ход, накіраваны на падрыў адзінства беларускай апазіцыі.
Характэрнае дыпфэйкавае відэа з'явілася ў тэлеграм-канале «Белорусский фронт», звязаным з Мінабароны Беларусі.
На ім паказаны быццам бы фрагмент ютуб-праграмы «Обычное утро» з кадрамі з прэс-канферэнцыі. Штучны інтэлект ператварае момант размовы Сяргея Ціханоўскага з журналістамі ў бойку з жонкай Святланай.
У гэтым жа ключы працуюць боты ў каментарах пад ролікамі тыктока і навінамі ў ютубе:
«А Ціханоўская не вельмі радая і адчуваецца, разгубленая. Не ў цэнтры ўвагі».
«Не пашанцавала ёй, цяпер яе засунуць далёка і давядзецца ісці працаваць. Яна меней за ўсіх выйграла ад гэтага вызвалення».
«Нешта Света зусім завяла».
«Света ў шоку. Што цяпер рабіць з гэтым прэзідэнтам. Яе звольняць ці на кухню».
«Светка думае: во Лукашэнка западлянку падкінуў! Толькі жыццё пачало наладжвацца!»
«А Светка сядзіць і думае: навошта цябе выпусцілі».
«Ціханоўская захвалявалася, што муж яе адсуне на другі план».
«Яна проста шарахаецца ад яго».
Як заўсёды цяпер, боты пры гэтым узаемна лайкаюць адны адных.
Іншая група ботаў грае ролю «незадаволенага вызваленнем народу» і праводзіць наратыў, што вызваляць не трэба было, і задаюцца пытаннем, навошта гэта было зроблена.
«Навошта яго выпусцілі? Патлумачце беларусам»,
«Дарэмна вызвалілі»,
«Аляксандр Лукашэнка, патлумачце ваш учынак, навошта???»,
«Навошта яго выпусцілі»,
«Ранавата вызвалілі»,
«Спадзяюся што наш бацька ведае, што робіць».
Частка ботаў на розныя лады спрабуе запэўніць, што пра Сяргея Ціханоўскага ўжо ніхто не памятае і людзям навіны пра яго нецікавыя:
«Ды ўсім по**й на гэтага далб**ба»,
«Няўжо няма больш важны тэм для абмеркавання?»,
«Хто гэта?».
Каментары