Заснавальнік партала Tut.by, хостынг-правайдара hoster.by, прадпрымальнік, грамадскі дзеяч, мецэнат Юрый Зісер памёр пяць гадоў таму, 17 мая 2020 года, пасля працяглай хваробы ў Мінску на 60-м годзе жыцця.
Юрый Зісер нарадзіўся 28 чэрвеня 1960 года ў Львове, яго бацька быў інжынерам, мама — музыкам. Вышэйшую адукацыю атрымаў у Паўночна-Заходнім політэхнічным інстытуце ў Санкт-Пецярбургу па спецыяльнасці «Электронныя вылічальныя машыны». У юнацтве паспеў папрацаваць паштальёнам. Працаваў тэхнікам і праграмістам у Львове.
У 80-х пазнаёміўся са сваёй будучай жонкай культуролагам Юліяй Чарняўскай і пераехаў да яе ў Мінск.
Некалькі гадоў быў сістэмным праграмістам у НДІ анкалогіі і медыцынскай радыялогіі ў Бараўлянах, займаўся навукай. У пачатку 90-х правёў два гады ў Лангепасе Цюменскай вобласці — працаваў праграмістам у кааператыве «Паходня».
У 1992 годзе заснаваў кампанію «Надзейныя праграмы», якая займалася распрацоўкай банкаўскага праграмнага забеспячэння.
У 2000 годзе з бясплатнай пошты стартаваў партал Tut.by, які за некалькі гадоў стаў самым папулярным беларускім анлайн-рэсурсам.
Стаяў ля вытокаў шэрагу беларускіх і міжнародных інтэрнэт-праектаў. Быў актыўным удзельнікам стартап-руху, ментарам. Актыўна займаўся дабрачыннасцю і мецэнацтвам.
Горача захапляўся класічнай музыкай, любіў джаз. Вырашыў атрымаць другую вышэйшую адукацыю — музычную. І ў 2013 годзе паступіў у Беларускую дзяржаўную акадэмію музыкі на клас аргана, які паспяхова скончыў у 2015 годзе. Адно з апошніх пачынанняў Юрыя Зісера было аднаўленне арганаў Беларусі. Пры яго фінансавай падтрымцы былі адноўлены арганы ў Мінску, Нясвіжы, Пінску.
Адметна і сумна, што амаль роўна праз год пасля смерці Юрыя Зісера, 18 мая 2021 года, Tut.by быў разгромлены.
Цяпер чытаюць
Ціханоўскі патлумачыў, чаму ён так паводзіў сябе ў Нью-Ёрку90
Каментары