Ці лятае Ціханоўская бізнэс-класам і як міністр замежных спраў Польшчы падкінуў яе на сваім самалёце

Як ахоўваюць Ціханоўскую

Бяспеку Святланы Ціханоўскай забяспечвае служба аховы, якую дала Літва. За апошнія гады, па словах Кучынскага, колькасць ахоўнікаў не скарачалася.

«Ёсць літоўская ахова і ёсць ахова ў іншай краіне, куды яна прыязджае. Іншая краіна робіць свае ацэнкі, колькі аховы даваць, як і калі».

Кучынскаму найбольш запомніўся прыём у Малдове:

«У Малдове быў картэж поўны — з аховай, з хуткай [дапамогай], з паліцыяй, з картэжам з матацыкламі. Пэўна, у Малдове, быў адзін з найвялікшых [картэжаў]. У Вялікабрытаніі была вялікая [ахова]. Шмат дзе, на самой справе. У Польшчы заўсёды добрая. У большасці краін [таксама]. Але Малдова неяк запомнілася».

Ці лятае бізнэс-класам

Для пералётаў у іншыя краіны Ціханоўская не карыстаецца бізнэс-класам. Як тлумачыць Кучынскі, яны не бачаць асаблівай розніцы паміж бізнэс-класам і бюджэтнымі месцамі. Да таго ж большасць пералётаў здзяйсняецца на кароткія дыстанцыі.

«Большасць нашых рэйсаў унутраныя, еўрапейскія. Чым адрозніваецца бізнэс-клас? Фіраначкай, якая там [аддзяляе частку салона]. Навошта шыкаваць і лётаць бізнэс-класам?»

Дыпламатычны дарадца Офіса Ціханоўскай расказаў, што часам яны лётаюць на адным самалёце з іншымі палітыкамі.

«Ты заходзіш — яны ўсе на першых бізнэс-шэрагах. Мы заўсёды ідзём туды (у эканом-клас. — НН)».

Па словах Кучынскага, яму падабаецца прыклад прэзідэнта Малдовы Маі Санду, якая заўсёды праяўляе сціпласць і лётае звычайнымі рэйсамі.

Павялічыць

Аднойчы ўлады Германіі прапаноўвалі выслаць па Ціханоўскую спецыяльны самалёт, каб яна магла паспець прыняць удзел у цырымоніі ў Берліне.

«Гэта мэрыя больш была, а не ўрад. Яны прапаноўвалі самалёт, каб мы маглі паспець. Таму што было некалькі мерапрыемстваў у нас ужо запланаваных. Каб мы маглі паспець, яны гатовы былі гэты прыватны самалёт прыслаць. Але мы ў выніку знайшлі варыянт звычайным паляцець».

Як Сікорскі падкінуў у Брусэль

Але была і гісторыя, калі Святлану Ціханоўскую на ўрадавым самалёце ў Брусэль падкінуў міністр замежных спраў Польшчы Радаслаў Сікорскі.

«Мы ляцелі на сустрэчу з іншымі міністрамі замежных спраў. Мы разумеем, што мы ляцім на адну падзею, у адзін дзень і ў адзін час. І пры гэтым у гэты дзень Ціханоўская таксама ў Варшаве, таму што быў Марш.

Была праблема, як даляцець своечасова. Не было рэйсаў. І я тады перамаўляўся з камандай [віцэ-прэзідэнта Еўрапейскай Камісіі] Каі Калас у Брусэлі. Гэта галоўны дыпламат усяго Еўразвязу. Мы перамаўляліся, як паспець. (…)

Я пачаў шукаць розныя варыянты. Пішу камандзе кіраўнічкі еўрапейскай дыпламатыі, што ў нас мерапрыемства вялікае — Марш, сустрэча з беларусамі, канферэнцыя. Яны кажуць: «Вы ж у Польшчы будзеце. Так [міністр замежных спраў Польшчы] Сікорскі таксама ляціць на гэту падзею. Можа, спытайце, каб ён вас падкінуў».

Мы звярнуліся, скарысталіся вось гэтай парадай».

Як расказаў Кучынскі, вылет быў з ваеннага аэрапорта, які знаходзіцца побач з аэрапортам імя Шапэна ў Варшаве.

«Там тое ж самае. Ты праходзіш кантроль. І ў апошні момант табе выдаюць пасадачны талон. Але, зразумела, што сам самалёт не як звычайны. (…) Адрозненне ў тым, што няма шэрагаў. Выдзяляецца адзін пакойчык. Пасля некалькі зон па чатыры месцы, каб людзі маглі камандамі сесці. І далей ёсць адна дадатковая секцыя, дзе ўжо шэрагамі стаяць крэслы. Але абсалютна звычайны самалёт. Трошкі сапраўды ўтульныя крэслы».

На пытанне, ці кармілі на борце польскага ўрадавага самалёта, Кучынскі прыгадаў:

«Снікерс давалі дакладна, і была, здаецца, нейкая грэчка з курыцай. Абсалютна звычайная [ежа], тое, што ў аэрапорце ў нейкіх лаўнджах (залах адпачынку. — НН) даюць».

• 2
• 1
• 0
• 0
• 0
• 0
• 0
• 0