У многіх з нас здараліся сітуацыі, калі бульба, цыбуля ці часнок доўга ляжаць і пачынаюць прарастаць. Адны лічаць, што такую гародніну яшчэ можна ўжываць у ежу, іншыя — што нельга. Вось што пра гэта кажуць спецыялісты.
Чым небяспечная прарослая бульба?
Калі бульба пачынае прарастаць, яна вырабляе глікаалкалоіды — саланін і хамарын, якія абараняюць расліны ад шкоднікаў. Але гэтыя рэчывы таксічныя і для чалавека.
«Гэты прыродны хімікат звычайна знаходзіцца ў зялёных частках скуркі. Таму нельга есці зялёную бульбу», — тлумачыць Крыс Бішап з універсітэту Лінкальна, піша BBC.
«У парастках узровень гэтых хімікатаў можа быць яшчэ вышэйшы, таму іх трэба цалкам выдаляць», — дадае ён.
Калі прарослую бульбу можна есці?
Паводле Агенцтва харчовых стандартаў Вялікабрытаніі (FSA), некаторую бульбу пасля прарастання ўсё ж можна ўжываць у ежу, калі:
клубні цвёрдыя, не маюць зморшчынак або гнілі;
парасткі кароткія — іх проста трэба зрэзаць;
няма зялёных плям — іх наяўнасць сведчыць пра высокую канцэнтрацыю саланіну.
«Калі бульба зелянее або становіцца мяккай — лепш яе выкінуць,» — кажуць у FSA.
Што будзе, калі з’есці зялёную або прарослую бульбу?
«Саланін таксічны для людзей і жывёл, асабліва для котак і сабак,» — папярэджвае прафесарка Кэці Мартын з Універсітэта Усходняй Англіі.
Пры невялікім атручэнні магчымыя ваніты, боль у жываце, дыярэя. У цяжкіх выпадках — слабасць, страта прытомнасці, і нават смерць.
Як правільна гатаваць прарослую бульбу
Зрэзаць усе парасткі і зялёныя месцы.
Калі парасткі доўгія, а бульба — мяккая або зморшчаная, яе лепш выкінуць.
Дзеці, цяжарныя і людзі з аслабленым імунітэтам не павінны ўжываць нават падрыхтаваную прарослую бульбу.
А што з прарослай цыбуляй і часнаком?
Тут навіны куды лепшыя. Прарослая цыбуля і часнок не ўтрымліваюць таксічных рэчываў, як бульба.
«У адрозненне ад бульбы, яны цалкам бяспечныя,» — кажа прафесарка Мартын.
Аднак парасткі могуць зрабіць смак цыбулі і часнаку горкім, а кансістэнцыю — мякчэйшай.
Цяпер чытаюць
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга86
Каментары