«Штогод губляем 15 аб'ектаў». Беларускія дачнікі змагаюцца з вышкамі сотавай сувязі
Жыхары беларускіх вёсак і садовых таварыстваў актыўна скардзяцца на вышкі сотавай сувязі. У выніку аператарам часта даводзіцца іх дэмантаваць і пераносіць, піша «СБ».
Прадстаўнікі беларускіх мабільных аператараў расказалі, як дачнікі ваююць з вышкамі сотавай сувязі.
Намеснік гендырэктара МТС па тэхнічных пытаннях Аляксей Цяжкіх кажа, што ў галовах у людзей часта ўзнікаюць узаемавыключальныя паняцці.
«Звяртаецца ў кампанію садовае таварыства і скардзіцца на праблемы са сувяззю. Прыходзім і кажам, што маем намер на іх тэрыторыі размясціць базавую станцыю. Нам адказваюць: «Не, нельга! Мы сувязь жадаем, а вышкі нам не трэба. Вы дзе-небудзь так размяшчайце, каб мы яе не бачылі», — распавёў Цяжкіх.
Яго калега з А1 Уладзімір Сачкоў распавёў, што з-за такіх скаргаў кампанія кожны год губляе 15 вышак.
«Штогод мы губляем 15 аб'ектаў. Скаргамі нас прымушаюць дэмантаваць іх, разбурыць, знесці, перанесці. Працэс пераезду нават больш складаны, чым будаўніцтва, бо людзі ўжо прывыклі да пэўнай якасці сувязі, якая пры перамяшчэнні для некаторых падае. Мы шукаем месца, дзе б пабудавацца, — і ўвесь працэс пачынаецца нанова: адвод зямлі, усе дазволы…» — зазначыў Сачкоў.
Па словах намесніка гендырэктара «Беларускіх воблачных тэхналогій» Міхаіла Дукі, дачнікі баяцца, што вышкі шкодзяць іх здароўю.
«Бывае так, што мы прыходзім, ставім вышку, базавую станцыю — і пачынаюцца скаргі іншага кшталту, не звязаныя з якасцю сувязі, а хутчэй дэманструючыя наяўнасць у насельніцтва асцярог з нагоды ўплыву працы базавых станцый на навакольнае асяроддзе і стан здароўя», — расказаў Дука.
Каментары
Будут переносить, там остатки лояльного лехтората окопались. Их желание - закон.