«А зможаце вылецець заўтра?» Джон Коўл расказаў, як піў з Лукашэнкам гарэлку, каб дамовіцца пра вызваленне палітвязняў
Вызвалення 14 палітвязняў, якое адбылося 21 чэрвеня, не было б, калі б намеснік спецпрадстаўніка Трампа Джон Коўл не завязаў бы з Лукашэнкам нефармальныя сувязі. Пра гэта сам амерыканскі пасланнік расказаў выданню Politico.
Па словах Коўла, гарэлку ён піў падчас доўгага абеду з Лукашэнкам.
«Я выпіў дзве чаркі, мяне не званітавала, але трэцяй я піць не стаў», — сказаў ён.
Амерыканскі дапламат патлумачыў, што яму папярэдне параілі «зачараваць» Лукашэнку.
«[Лукашэнка] завёў размову аб Дзяржаўным дэпартаменце, і я сказаў: «Так, усё, што яны хочуць рабіць, гэта бла-бла-бла», — і яму гэта спадабалася».
Лукашэнка здаўся Коўлу разумным і кемлівым. Амерыканец лічыць, што той «сапраўды хоча паляпшэння адносін з ЗША». А таксама, што Лукашэнка хоча сыграць сваю ролю ў перамовах па вайне ва Украіне.
Пакуль яны пілі гарэлку, трэба было прамаўляць тосты. Лукашэнка прапанаваў выпіць за Трампа. Коўл, у адказ, падняў тост за Лукашэнку. Пілі і за іншае, але Коўл не ўдакладніў за што.
«Усё гэта было весела», — сказаў Коўл.
Сустрэча спецпрадстаўніка Трампа Кіта Келага, яго намесніка Джона Коўла і Лукашэнкі адбылася 21 чэрвеня. 22 чэрвеня стала вядома пра вызваленне 14 палітвязняў — іх адвезлі ў Літву.
Як падкрэсліваецца, гаворка не ідзе пра якія-небудзь «здзелкі»: адвакат Коўл не ёсць самастойнай палітычнай фігурай. Ягоная роля, хутчэй, носіць тэхнічны і дапаможны характар.
Politico прыводзіць яшчэ некалькі цікавых дэталяў.
Пасля перасячэння беларускай мяжы машына з Коўлам і амерыканскімі дыпламатамі спынялася на вясковай дарозе: мянялі дыпламатычныя нумарныя знакі на сваіх аўтамабілях, каб не прыцягваць увагі.
Пра Палац Незалежнасці ў артыкуле кажуць, што ён «памерам з невялікі тэрмінал аэрапорта». «Ён такі вялікі, што Том Брэйдзі [зорка амерыканскага футбола] не змог бы дакінуць мяч з аднаго канца вестыбюля ў другі», — сказаў Коўл.
78-гадовы Коўл — вопытны адвакат, найбольш вядомы тым, што дапамог заключыць пагадненне на 386 мільярдаў долараў з буйнымі тытунёвымі кампаніямі ў канцы 1990-х.
У яго таксама было звілістае палітычнае жыццё; ён доўгі час быў дэмакратам, але падтрымаў Джона Маккейна ў 2008 годзе і пасябраваў з Сарай Пэйлін, але ў 2016 годзе зноў падтрымліваў дэмакрата — Марціна О’Мэлі.
У 2021 годзе ён абараняў інтарэсы Трампа ў доўгаіграючым працэсе супраць сацыяльных сетак, абвінавачваючы іх у цэнзуры. Woke-рух зрушыў мяне ўправа», — сказаў ён у адным з інтэрв'ю.
З Трампам яго ўпершыню пазнаёміла ягоная жонка, Грэта Ван Састэрэн, былая вядучая Fox News, якая шмат разоў брала інтэрв'ю ў будучага прэзідэнта. Тое знаёмства адбылося яшчэ гадоў 20 назад.
У артыкуле сцвярджаецца, што беларускае заданне Коўла пачалося з тэлефанавання з Дзяржаўнага дэпартамента пры канцы красавіка 2025 года.
«Ці маглі б вы паехаць у Мінск, каб сустрэцца з Лукашэнкам, чалавекам, якога часта называюць апошнім дыктатарам Еўропы?»
«Добра», — сказаў Коўл.
«А зможаце вылецець заўтра?»
«Не добра!» — адказаў ён. Але паляцеў.
«Істотны тут не столькі змест застольных размоваў і каларытныя дэталі, колькі сам факт таго, што такі дасведчаны чалавек, як Джон Коўл, палічыў магчымым публічна расказаць пра гэта, — адзначае ў сваім тэлеграм-канале палітолаг Аляксандр Фрыдман. — Звычайна падобныя эпізоды застаюцца за кадрам, пакуль перамовы працягваюцца — каб не нашкодзіць іх ходу. Цяпер жа, пасля ўльтыматуму Трампа, яны былі агалошаныя».
Памёр паэт Уладзімір Карызна, аўтар слоў да цяперашняга дзяржаўнага гімна Беларусі8
Каментары
Жыве БЕЛАРУСЬ /ВКЛ !
Той намер не сам з'явіўся.
"Разумны і кемлівы" не значыць "добры і справядлівы".
Тое, што "Лукашэнка хоча сыграць сваю ролю ў перамовах па вайне ва Украіне" значыць, што на перамовах гучала не толькі тэма палітвязняў.
Я ўсё роўна не веру, што раскрылі ўвесь ход перамоў і аргументы, якія гучалі, наступствы з іх, якія адбудуцца, або наадварот, ужо не адбудуцца.