Шэлег: Беларускія лекі нічым не адрозніваюцца ад старых прэпаратаў буйных фармацэўтычных кампаній
У новым выпуску ТОКу былы палітзняволены і супрацоўнік прадстаўніцтваў буйных міжнародных фармацэўтычных кампаній у Беларусі Сяргей Шэлег ацаніў якасць лекаў беларускай вытворчасці.
Паводле Сяргея Шэлега, амаль усе лекі, якія выпускаюцца ў Беларусі, з’яўляюцца генерычнымі прэпаратамі — копіямі арыгінальных прэпаратаў, на якія ўжо скончыўся тэрмін патэнтнай абароны. Ён падкрэсліў, што вытворчасць таблеткі — гэта не нешта звышскладанае, і беларускія заводы маюць доступ да тых жа фармацэўтычных субстанцый, што і вядучыя сусветныя кампаніі.
«Адважуся вас запэўніць: тэхналогіі вырабу таблеткі гэта не супертэхналогіі. Фармацэўтычныя субстанцыі — актыўныя інгрэдыенты тых жа таблетак — вядучая кампанія і беларускія кампаніі могуць закупляць у адным месцы», — даводзіць эксперт, але прызнае магчымасць парушэння тэхналогіі вытворчасці на беларускіх прадпрыемствах:
«Прэс, напрыклад, не занадта моцна можа сціснуць таблетку да патрэбнага памеру, ці пакрыць яе [ахоўнай] плёнкай».
Але, як запэўнівае Шэлег, «лекавыя прэпараты, якія вырабляюцца на беларускіх заводах, нічым не адрозніваюцца ад старых прэпаратаў, што выпускаюцца буйнымі фармацэўтычнымі кампаніямі».
На погляд Шэлега, сутнасць працы фармацэўтычных кампаній не ў тым, каб бясконца вырабляць адны і тыя ж лекі, а ў тым, каб распрацоўваць новыя. І тут, як ён заўважае, зусім іншая размова:
«Беларускія фармацэўтычныя заводы свету не прадставілі ні аднаго новага лекавага сродку [ўласнай распрацоўкі] за ўсю гісторыю існавання. Гэта ўвогуле вялікая рэдкасць».
Як даводзіць эксперт, вынаходніцтвам новых прэпаратаў не мог пахваліцца і Савецкі Саюз.
На пытанне, ці не крыецца прычына гэтага ў недастатковым развіцці навуковых даследаванняў у гэтым кірунку, Шэлег патлумачыў:
«Навука ўжо даўно стала індустрыяй, у якую ўцягнуты гіганцкія сродкі і вялікая колькасць людзей. У Беларусі няма такіх матэрыяльных і людскіх магчымасцяў, каб усё гэта рэалізаваць.
Вы павінны разумець, што ўсе стадыі вывучэння лекавага сродку, якія ўрэшце рэшт прыводзяць да з'яўлення прэпарата для лячэння людзей, займаюць многія гады, на гэта трацяцца мільярды даляраў. Гэта некалькі дзясяткаў бюджэтаў усёй нашай аховы здароўя».
Нагадаем, што 64-гадовы Сяргей Шэлег апынуўся за кратамі за салідарнасць з беларусамі: ён данаціў арганізацыям, якія праз час, заднім днём, былі прызнаныя экстрэмісцкімі і тэрарыстычнымі. 21 чэрвеня 2025 года пасля візіту ў Мінск спецпрадстаўніка прэзідэнта ЗША Кіта Келага ён апынуўся ў складзе 14 чалавек, якія былі выпушчаны на волю.
Каментары
Кстати, как Шелег может объяснить, что лаборатории, лет 10 уже, не проверяют ингридиенты и субстанции на соответствие химсостава, по распоряжению сверху, а просто штампуют нужные проверки и разрешения на бумаге ?