Расійскія турысты знайшлі на пляжы ў Тайландзе ваніты кашалота. Яны каштуюць шалёныя грошы
Турысты з Санкт-Пецярбурга падчас адпачынку на пляжы Пхукета ў Тайландзе знайшлі кавалак амбры — рэдкага і каштоўнага рэчыва, вядомага як «ваніты кашалота». Ягоная вага склала каля 7 кілаграмаў, і калі гэта сапраўдная амбра, то яе кошт можа дасягаць 135 тысяч даляраў.
Амбра ўтвараецца ў стрававальнай сістэме кашалотаў і вельмі цэніцца ў парфумернай індустрыі за свае ўнікальныя ўласцівасці. Яна дапамагае захоўваць пах, робячы яго больш насычаным і доўгім. У адрозненне ад сінтэтычных заменнікаў, натуральная амбра надае духам мяккасць, цяпло і ледзь улоўную жывёльную нотку, што асабліва цэніцца ў элітнай парфумерыі.
Турысты праверылі знаходку ў дзвюх лабараторыях у Тайландзе — абедзве пацвердзілі, што гэта амбра. Але канчатковае заключэнне павінен даць спецыялізаваны ўніверсітэт марскіх даследаванняў, размешчаны за 500 кіламетраў.
Паколькі часу да адлёту з краіны засталося мала, турысты пакінулі каштоўнасць на захоўванне ў знаёмых. Пасля яны плануюць вярнуцца ў Тайланд, каб атрымаць афіцыйнае пацвярджэнне і адпаведныя дакументы. Без спецыяльнага дазволу вывозіць амбру з Тайланда нельга — за гэта прадугледжаная крымінальная адказнасць.
У апошнія гады падобныя выпадковыя знаходкі становяцца ўсё больш каштоўнымі, паколькі камерцыйны кітабойны промысел цяпер забаронены. Таму амбра паступае на рынак пераважна дзякуючы «пляжным паляўнічым», якія высочваюць рэчыва ў раёнах міграцыі кітоў.
Каментары