«Вось такі цырк». У Бабруйску па даведку ад акуліста людзі стаяць у чарзе ў оптыку
Жыхар Бабруйска выклаў у тыкток відэа доўгай чаргі ў оптыку. Аказваецца, людзі стаяць не па зніжку ці нешта з распродажу. Гэта чарга да афтальмолага — бо ў горадзе не хапае дактароў, піша «Люстэрка».
На кадрах відаць, як у сонечны дзень каля ўваходу ў салон «Люкс оптыка» на вуліцы Менскай у Бабруйску стаіць чарга з больш чым дзясятка чалавек.
«Вось такі вось цырк зладзілі людзі. А палове восьмай раніцы займаюць чаргу ў «Оптыку», каб узяць даведачку дзіцяці ў школу. У паліклініцы няма акулістаў», — каментуе мужчына за кадрам.
Сапраўды, некаторыя прыватныя крамы оптыкі прапануюць платную паслугу па праверцы зроку і выдачы даведак для навучальных устаноў.
Напрыклад, у адной з сетак салонаў, якія працуюць у Мінску і іншых гарадах, кошт выпісвання даведкі з дыягностыкай і афтальмаскапіяй складае 40 рублёў. Але чаму гэтую паслугу стала праблематычна атрымаць бясплатна ў дзяржаўнай паліклініцы?
Каб высветліць гэта, журналіст «Люстэрка» пад выглядам занепакоенага бацькі патэлефанаваў на гарачую лінію Бабруйскай цэнтральнай бальніцы. Менавіта яна кіруе ўстановамі аховы здароўя горада.
На пытанне, чаму людзі вымушаныя звяртацца ў прыватныя оптыкі і ці будзе такая даведка сапраўдная для школы, у бальніцы адказалі, што прычына — у недахопе кадраў.
«Спецыялістаў у нас, на жаль, не хапае. Але гэта не толькі ў нашым горадзе, такая сітуацыя ў цэлым [у Беларусі], — адказала дзяжурная. — Калі ў крамах оптыкі праводзяць паўнавартасны агляд, а не проста правяраюць вастрыню зроку, то тады так, [даведка адтуль ] падыходзіць».
Пры гэтым яшчэ 15 жніўня загадчыца Бабруйскай гарадской дзіцячай паліклінікі № 4 Кацярына Шмакава ў каментары для тэлеграм-канала «Говорит и показывает Бобруйск» запэўнівала, што праблем з доступам да доктара няма:
«У нас робіцца прыём дзяцей дзіцячым доктарам-афтальмолагам. Запісацца можна напрамую праз рэгістратуру, тэлефон ці сайт».
Журналіст «Люстэрка», таксама прадставіўшыся бацькам, патэлефанаваў у рэгістратуру гэтай паліклінікі, каб запісаць дзіця на прыём. Аднак пра анлайн-запіс або браніраванне часу па тэлефоне гаворкі не вялося.
— Дзіцяці на агляд афтальмолага для даведкі ў школу калі можна запісаць? — спытаў журналіст.
— Можаце прыйсці заўтра з 12.00 да 13.00 па чарзе або ў панядзелак з 16.00 да 18.00 падысці, — адказала супрацоўніца рэгістратуры.
— Толькі па жывой чарзе? А запісацца загадзя нельга?
— Так, толькі па жывой.
Цяпер чытаюць
Беларусы ў сацсетках абураюцца, што дэкрэтніцам нібыта плацяць больш, чым тым, хто ходзіць на працу4
Каментары
10 чалавек гадзіна ці 2 і маешь паперку . Выйсце
Спытай колькі чакаць і каштуе у суууседзей па колу і далей на захад ..
Страхавая медыцына гэта дзля машэнікаў страхаўшчыкоў і лекарей якія з імі у доле....