Каб набыць квіток на транспарт праз мабільны дадатак, цяпер давядзецца даплачваць
Сэрвіс «Аплаці» ўвёў спецыяльную падпіску, без якой купіць квіток на транспарт будзе нельга. Але пры пэўных умовах яна можа быць бясплатнай.
Сэрвіс «Аплаці» уводзіць плату за магчымасць набываць квіткі на транспарт. З 22 верасня ўсім карыстальнікам давядзецца афармляць падпіску «Транспарт» за 1 рубель у месяц. Без яе набыць квіток будзе немагчыма.
Сэрвіс прэзентаваў падпіску як новую паслугу. Рубель будуць спісваць з кашалька карыстальніка аўтаматычна кожны месяц. Паведамляецца, што падпіска «адкрывае доступ да ўсіх магчымасцяў набыцця квіткоў праз дадатак».
Падпіска пры гэтым можа быць бясплатнай. З карыстальніка не спішуць рубель за наступны месяц, калі на працягу бягучага месяца ён набудзе 25 і больш аднаразовых квіткоў ці набудзе праязны на суму ад 15 рублёў.
У кампаніі падкрэслілі, што права на бясплатны месяц нельга адкласці ў запас ці перанесці.
Уладальнікам пакета «Прэміум», які каштуе 9,99 рубля ў месяц, даплачваць за падпіску не спатрэбіцца.
Каментары