Стваральнік саўндтрэку для World of Tanks адсвяткаваў у Мінску свой развод
Грандыёзнага вяселля ў кампазітара і прадзюсара Андрэя Клімкі не было. Але адсвяткаваць развод разам з былой жонкай ён вырашыў маштабна — з вядучым, дыджэямі і велізарным тортам-сэрцам.
Жонкай Андрэя Клімкі, які напісаў саўндтрэк да вядомай гульні World of Tanks, была беларуская блогерка Крысціна Герасімава. Яны пражылі ў шлюбе тры гады.
Пра тое, як рыхтаваліся да разводу, пара падрабязна распавядала ў сацсетках. Яны сцвярджалі, што жартаўлівы тон дапамагаў ім лепш пражываць стрэс. І казалі, што хочуць прадэманстраваць усім: спыненне шлюбу можа быць экалагічным.
Пачыналася ўсё як ва ўсіх: шмат месяцаў абдумвання рашэння, паход у ЗАГС ды падача заявы на развод. У Беларусі, нават калі і муж, і жонка хочуць развесціся, не маюць спрэчных пытанняў наконт сумеснай маёмасці і дзяцей, дзяржава ўсё роўна дае ім час на прымірэнне. Андрэй і Крысціна выбралі мінімальны тэрмін — месяц. Падачу заявы пара адсвяткавала сумесным абедам у рэстаране.
За адведзены месяц Андрэй па-сяброўску вучыў Крысціну вырашаць побытавыя пытанні — кшталту самастойна аплачваць камунальныя паслугі.
Крысціна жартавала, што маштабнае свята з нагоды разводу ёй неабходна, бо на вяселлі яна такога не атрымала. Сапраўды на відэа трохгадовай даўніны бачна, што цырымонія была даволі сціплая: жаніх і нявеста ў ЗАГС Ленінскага раёну прыйшлі ў паўсядзённым адзенні.
17 верасня пара вярнулася туды ж, каб паставіць подпісы з іншай нагоды. Адзеліся ўрачыста, Крысціна несла букет жоўтых кветак, а на выхадзе іх сустракаў музыка, які граў на акардэоне — шчаслівыя разведзеныя танчылі.
Для свята абралі шыкоўныя апартаменты ў цэнтры сталіцы, якія маюць выхад на дах. Гасцей забаўлялі вядучы і дыджэі. Музыку падабралі тэматычную — напрыклад, песню «Я поднимаю тост за своего бывшего» Люсі Чабоцінай.
Замест традыцыйнага для маладзёнаў каравая пара ела гіганцкі бургер. Не забыліся і пра фатографа, відэографа ды рылсмэйкера. Падарункі новаразведзеныя таксама атрымалі. А госці жартавалі, што не ведаюць, як праходзіць першая анты-шлюбная ноч.
У цесным коле сяброў былыя муж і жонка ўрачыста знялі пярсцёнкі і падзякавалі адно аднаму за сумеснае жыццё. А потым разам разрэзалі велізарны торт у форме сэрца і развялі ў розныя бакі яго палавінкі як сімвал таго, што каханне скончылася.
З беларускіх селебрыці раней свой развод гучна адзначалі оперная спявачка Маргарыта Ляўчук і прадзюсар Аляксандр Чахоўскі.
Цяпер чытаюць
Сёстры Груздзевы драматычна расказалі, як іх выкінуў за дзверы міністр культуры Руслан Чарнецкі. «Як сабак»16
Каментары