Гвалт у Мексіцы пасля гібелі наркабарона Эль Менча: Нацыянальная гвардыя страціла 25 чалавек

Паводле звестак міністра бяспекі, у выніку гэтых нападаў загінулі як мінімум 25 байцоў Нацыянальнай гвардыі, піша Бі-бі-сі.

59‑гадовы Немесіа Асегера Сервантэс, больш вядомы пад мянушкай «Эль Менча», памёр ад ранаў, атрыманых у нядзелю падчас аперацыі па яго затрыманні, праведзенай мексіканскім спецназам.

Пасля гэтага як мінімум у 20 з 31 штата Мексікі ўспыхнулі сутыкненні з удзелам баевікоў картэля «Халіска — Новае Пакаленне» (CJNG), заснаванага забітым крымінальным лідарам.

Як паведаміў у панядзелак прэсе міністр абароны Мексікі Рыкарда Трэвілья, на захад краіны на ахову парадку адпраўлены 2500 салдат.

CJNG — адна з самых небяспечных мафіёзных арганізацый Мексікі, а яе нябожчык лідар быў першым нумарам у спісе злачынцаў, якіх шукаюць у краіне.

Па словах міністра абароны, змагары з наркамафіяй змаглі схапіць Эль Менча ў горадзе Тапальпа ў штаце Халіска, высачыўшы яго палюбоўніцу. Ён быў цяжка паранены ў перастрэлцы паміж яго ахоўнікамі і спецназам. Вайскоўцы павезлі яго па паветры ў сталіцу, але ён памёр па дарозе.

У перастрэлцы, згодна з заявай Міністэрства абароны, былі забіты як мінімум шасцёра ахоўнікаў Эль Менча і паранены трое вайскоўцаў.

Міністр бяспекі Мексікі Амар Гарсія Харфуч паведаміў прэсе, што з моманту смерці Эль Менча, акрамя 25 нацгвардзейцаў, забіты яшчэ больш за 30 чалавек: 30 членаў картэля, турэмны ахоўнік і супрацоўнік пракуратуры штата.

Прэзідэнт Мексікі Клаўдыя Шэйнбаўм пахваліла вайскоўцаў за аперацыю па затрыманні Эль Менча і сказала, што зараз галоўнае для яе — аднавіць спакой і парадак у краіне.

«На большай частцы тэрыторыі краіны ўсё ідзе ў звычайным рэжыме, — напісала Шэйнбаўм у сацсетцы Х. — Падтрымліваецца поўная каардынацыя з урадамі ўсіх штатаў; мы павінны заставацца ў курсе падзей і захоўваць спакой».

Картэль «Халіска — Новае Пакаленне» (CJNG) узнік прыкладна ў 2010 годзе ў штаце Халіска і з часам распаўсюдзіў свой уплыў па ўсёй краіне.

Атрымаўшы вестку пра смерць Эль Менча, члены картэля «Халіска — Новае Пакаленне» пачалі ладзіць беспарадкі ў многіх гарадах Мексікі.

У некаторых месцах яны перакрывалі дарогі, раскідаючы па асфальце шыпы і цвікі, якія праколвалі шыны аўтамабіляў. У іншых — захоплівалі машыны і аўтобусы, падпальвалі іх і блакавалі імі трасы.

Акрамя таго, былі падпалены дзясяткі крамаў, офісаў і аддзяленняў банкаў.

У многіх гарадах у нядзелю вуліцы абязлюдзелі: мясцовыя ўлады рэкамендавалі людзям заставацца дома.

Прэзідэнт Шэйнбаўм заявіла, што да раніцы панядзелка ўсе дарогі былі разблакаваны.

Эль Менча шукалі і Злучаныя Штаты: Дзярждэпартамент прапаноўваў 15 млн даляраў за інфармацыю, якая дапамагла б яго злавіць.

Міністэрства абароны Мексікі заявіла, што захоп Эль Менча правяла армія пры падтрымцы Нацыянальнай гвардыі і ВПС. Мінабароны адзначыла, што даныя, якія спрыялі падрыхтоўцы аперацыі, былі атрыманы ад ЗША.

Прэс-сакратар Белага дома Кэралайн Левіт пацвердзіла, што ЗША прадаставілі Мексіцы разведданыя. Яна дадала, што адміністрацыя Дональда Трампа «выказвае ўдзячнасць і падзяку мексіканскім вайскоўцам за супрацоўніцтва і паспяховае правядзенне гэтай аперацыі».

• 1
• 1
• 0
• 1
• 1
• 0
• 1
• 0