Пасля 2022 года сярод студэнтаў БДУ стала менш абыякавых да беларускай мовы
У апошнім нумары Acta Albaruthenica, часопіса кафедры беларусістыкі Варшаўскага ўніверсітэта, выйшла даследаванне Веранікі Бандаровіч пра самаідэнтыфікацыю моладзі, звяртае ўвагу тэлеграм-канал Беларускага інстытута публічнай гісторыі.
Ананімнае анкетаванне праводзілася ў лютым 2023‑га сярод студэнтаў геаграфічнага факультэта БДУ, а таксама студэнтаў вайсковага факультэта, якія разам наведвалі заняткі па беларускай мове.
Было апрацавана 85 анкет. На адно з пытанняў — «Ці важная беларуская мова ў навакольным жыцці?» — у параўнанні з вынікамі папярэдніх апытанняў вырасла колькасць адказаў «важная» (26 адказаў) і «вельмі важная» (33) — яны лідзіруюць з вялікім адрывам. Папярэднія два апытанні паводзіліся ў лютым-траўні і ў верасні 2022-га.
Сярод высноў Веранікі Бандаровіч: «усведамляецца ўсё большае значэнне беларускай мовы як атрыбута асобнай дзяржавы», «па-ранейшаму самы папулярны адказ на пытанне пра лёс беларускай мовы «залежыць ад кожнага з нас».
Каментары