Кім Чэн Ын правёў маштабны ваенны парад і пахваліўся новай ракетай ФОТА
Лідар Паўночнай Карэі правёў учора вялікі ваенны парад з нагоды 80‑годдзя Працоўнай партыі КНДР, на якім была прадэманстраваная новая міжкантынентальная балістычная ракета, паведамляе Паўночнакарэйскае інфармацыйнае агенцтва KCNA
Парад, які прайшоў позна ўвечары ў пятніцу, быў прысвечаны 80‑годдзю заснавання кіруючай Працоўнай партыі КНДР і стаў працягам святкаванняў, што прайшлі ў чацвер.
Сярод замежных гасцей, якія прыехалі ў Пхеньян на юбілей, былі прэм’ер-міністр Кітая Лі Цян, дэлегацыя з Расіі на чале з былым прэзідэнтам Дзмітрыем Мядзведзевым, а таксама кіраўнік Камуністычнай партыі В’етнама То Лам.
На ваенным парадзе Паўночная Карэя прадэманстравала сваю найсучаснейшую міжкантынентальную балістычную ракету Hwasong-20, якую KCNA апісала як «наймагутнейшую сістэму ядзернай стратэгічнай зброі» краіны.
«На праспектах да параднай плошчы ўрачыста выстраіліся пешыя калоны, уключаючы калоны ўсіх відаў і родаў войскаў узброеных сіл Рэспублікі, і калоны звышсучасных узбраенняў. На плошчу выйшаў аркестр Заслужанага дзяржаўнага хору, які адказвае за музычнае выкананне на ваенным парадзе.
Упрыгожваючы пачатак ваеннага параду, прайшло цырыманіяльнае выступленне зводных ваенных аркестраў, якое кранальна закранае сэрцавыя струны гледачоў дынамічнай мелодыяй рэвалюцыйных ваенных песень.
Члены ваенных аркестраў рытмічна змянялі пастраенне, а дзяўчаты з шаблямі паказалі своеасаблівыя трукі, затым барабаншчыцы і члены ганаровай варты выканалі спрытныя трукі з маленькімі барабанамі і вінтоўкамі», — гаворыцца ва ўзнёслым рэпартажы KCNA.
Каментары
[Зрэдагавана]