Кіраўніцтва Гродзенскай вобласці мае намер ператварыць Навагрудак у горад-музей. Пра гэта заявіў губернатар Юрый Караеў на выязной нарадзе ў Навагрудку, прысвечанай развіццю турыстычнага патэнцыялу рэгіёна.
Караеў адзначыў, што асновай для прыцягнення турыстаў павінны стаць дзве ключавыя кропкі: Навагрудскі замак і Музей яўрэйскага супраціву, размешчаны ў будынку, дзе падчас вайны знаходзілася яўрэйскае гета.
Для комплекснага развіцця турыстычнай інфраструктуры трэба сур'ёзна абнавіць вулічную і дарожную сетку, прывесці ў парадак фасады будынкаў і добраўпарадкаваць аб'екты сацыяльнай сферы, піша прэсавая служба аблвыканкама.
На гэтыя мэты ў бягучым годзе ўжо выдзелена 12 мільёнаў рублёў, якія неабходна асвоіць.
Як піша канал «Пул 4 Регион», да развіцця музея ўжо праявілі цікавасць прыватныя інвестары, «глыбока паглыбленыя ў гістарычную тэматыку і гатовыя ўкладаць сродкі ў гэты праект».
Губернатар, паводле канала, вызначыў канчатковую мэту: «Мы павінны зрабіць Навагрудак горадам-музеем!»
Навагрудак — гэта горад, дзе карані сям’і Джарэда Кушнера, зяця прэзідэнта ЗША — там яны перажылі Халакост і ўдзельнічалі ў партызанскім супраціве.
У жніўні стала вядома, што Лукашэнка запрасіў Дональда Трампа з сям'ёй у Мінск, і гэта запрашэнне, як сцвярджае прэс-служба Лукашэнкі, было прынята.
Цяпер чытаюць
Трамп запрасіў Лукашэнку ўвайсці ў Раду міру па Газе38
Каментары
[Зрэдагавана]