Былы дырэктар Ліцэя БДУ расказаў, як Коля Лукашэнка нечакана яму дапамог
У новым выпуску ТОКу Ігар Варакса, які ў 2019‑-2021 гадах быў дырэктарам Ліцэя БДУ, расказаў, як факт паступлення малодшага сына Аляксандра Лукашэнкі дазволіў вырашыць адну праблему.
«Не самая прыемная справа ў дырэктарскай рабоце — займацца ўступнай кампаніяй», — заўважае Ігар Варакса і тлумачыць, што акрамя вялікага аб'ёму працы, звязанага з падрыхтоўкай уступных іспытаў і праверкай вынікаў, дырэктар знаходзіцца пад ціскам розных просьбітаў. Аб такой практыцы, па словах Вараксы, яго папярэджваў былы дырэктар Ліцэя Генадзь Пальчык.
«І сапраўды пайшлі. Было так дзіўна. Розныя людзі», — заўважае Варакса. «Я не ведаю, што было дагэтуль. (…) Але ў 2020 годзе тое, што мне моцна дапамагло, — што акурат Мікалай Лукашэнка захацеў паступаць у Ліцэй».
На пытанне, чым канкрэтна гэта дапамагло, былы дырэктар Ліцэя БДУ адказаў:
«Была такая думка, раз ён падаў дакументы, мы, напэўна, будзем самі яго неяк прасоўваць. Карацей, да мяне ніхто не звяртаўся з Адміністрацыі [Лукашэнкі]. Ніхто.
А калі хтосьці прыходзіў і пачынаў: «Ну, вось тут трэба, можа, дапамагчы…» — я кажу: «Ведаеце, Мікалай Лукашэнка паступае ў Ліцэй БДУ ў гэтым годзе. Вы, напэўна, чулі. Дык вось, за яго ніхто не просіць. А вы хочаце, каб за ваша дзіця мы штосьці рабілі? Калі сын прэзідэнта паступае сам, а вы хочаце, каб вашаму дапамаглі?»
Гэта была проста бомба. Усе: «Ну, окей». І ўсё, пайшоў».
Па словах Вараксы, такіх прасіцеляў, якія звярталіся непасрэдна да яго, было 5‑10 чалавек. І на ўсіх дзейнічала яго дзяжурная фраза пра Колю Лукашэнку.
«Гэта была выдатная рэч. Я вельмі ўдзячны Мікалаю, што ён у тым годзе паступаў».
Нагадаем, што ў чэрвені 2020 года стала вядома, што Коля Лукашэнка паступіў у Ліцэй БДУ. Ён абраў біялагічны профіль, конкурс на які складаў 6,5 чалавека на месца. Аднак пасля пратэстаў лета 2020‑га яго дакументы забралі, ён пайшоў у 10‑ты клас прыватнай школы, заснавальніцай якой з'яўлялася яго маці — Ірына Абельская.
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім12
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім
Бабарыка і Калеснікава пагаварылі з Інгай Ругінене і заклікалі Літву «далучыцца да дыпламатычных намаганняў ЗША» і «не прапусціць акно магчымасцей»3333
Каментары