Сама яна называла сябе «дачкой Чавеса». А замест тытула «першая лэдзі» абрала званне «першая змагарка». На працягу трох дзесяцігоддзяў Сілія Флорэс адыгрывала цэнтральную ролю ва ўрадзе Венесуэлы.
Калі амерыканскі спецназ арыштаваў Нікаласа Мадура і яго жонку Сілію Флорэс, яны захапілі не толькі прэзідэнта Венесуэлы, але і адну з самых уплывовых жанчын краіны.
Флорэс 69 гадоў. Нарадзілася ў невялікім горадзе Цінакільё, але вырасла ў Каракасе. Яна вывучала права і скончыла Універсітэт Санта-Марыя. У студэнцкія гады Флорэс не толькі спасцігала юрыдычныя кодэксы, але і пачала цікавіцца палітыкай, пранікацца левымі ідэямі.
У 1992 годзе малады падпалкоўнік Уга Чавес здзейсніў няўдалую спробу дзяржаўнага перавароту супраць прэзідэнта Карласа Андрэса Перэса. Чавес апынуўся ў турме, і яму была патрэбная юрыдычная дапамога. Сілія Флорэс, якая тады была маладой і амбіцыйнай адвакаткай, далучылася да каманды яго абаронцаў, што дамагліся яго памілавання і вызвалення з турмы ў 1994-м.
Менавіта ў той бурны рэвалюцыйны перыяд завязаліся і яе адносіны з Нікаласам Мадура, які быў прафсаюзным актывістам. Варта адзначыць, што Сілія старэйшая за свайго мужа на шэсць гадоў. Іх саюз доўгія гады заставаўся грамадзянскім — афіцыйна яны пабраліся шлюбам толькі ў 2013 годзе, ужо пасля таго, як Мадура стаў выконваць абавязкі прэзідэнта. Гэтае партнёрства многія аналітыкі называюць палітычным тандэмам, дзе Сілія часта выконвае ролю стратэга, накіроўваючы дзеянні мужа.
Да саюза з Мадура Сілія была замужам за Вальтэрам Гавідыя Радрыгесам. Ад першага шлюбу ў Сіліі Флорэс трое сыноў: Вальтэр Якаб, Ёсваль Аляксандр і Ёсэр Даніэль Гавідыя Флорэс. З Нікаласам Мадура сумесных біялагічных дзяцей у яе няма. Аднак Мадура мае ўласнага сына ад папярэдніх адносін — Нікаласа Мадура Геру (вядомага як «Нікаласіта»). Разам яны ўтварылі вялікую сям'ю, якая функцыянуе як адзіны палітыка-эканамічны клан.
Палітычная кар'ера: першая жанчына ва ўладзе
У 2000 годзе Флорэс была абраная ў Нацыянальную асамблею, а ў 2006‑м стала яе старшынёй — першай жанчынай у гісторыі Венесуэлы на гэтай пасадзе. Характэрна, што ў спікерскім крэсле Сілія змяніла менавіта Нікаласа Мадура, якога прызначылі міністрам замежных спраў.
10 студзеня 2007 года Флорэс прывяла да прысягі Уга Чавеса пасля прэзідэнцкіх выбараў. Яна ўзначальвала парламент да 2011 года — гэта былі гады ўмацавання чавісцкай мадэлі ўлады, калі дзяржава ўсё больш ператваралася ў сістэму, дзе рэальныя рашэнні прымаюцца ў вузкім коле набліжаных.
Пазней, у 2012—2013 гадах, яна працавала Генеральным пракурорам краіны.
Як адзначае The New York Times, Флорэс стварыла судовую сістэму, у якой амаль кожнае важнае рашэнне прымалася праз яе, і ўмацоўвала дзяржаўныя інстытуты сваякамі і прыхільнікамі. У той жа час, паводле слоў журналістаў, аналітыкаў і былых чыноўнікаў, яе сям'я назапасіла велізарныя багацці.
Калі Мадура прыйшоў да ўлады, Сілія афіцыйна выйшла замуж за яго і катэгарычна адмовілася ад традыцыйнага тытула «першая лэдзі», бо лічыла яго буржуазным перажыткам, які прыніжае ролю жанчыны ў грамадстве. Замест гэтага яна ўвяла ва ўжытак тытул «першая змагарка» (па-іспанску Primera Combatiente).
Жаданне падкрэсліць сваю ідэалагічную сувязь з папярэднікам праявілася і ў 2015 годзе, калі Сілія стварыла акаўнт у Twitter, у якім апісала сябе як «дачка Чавеса». Праўда, пазней яна ўсё ж крыху змякчыла гэты гучны вобраз, змяніўшы подпіс на больш лаканічнае «чавістка». Сам Нікалас Мадура называе жонку Сілітай.
Пасля вяселля палітычная кар'ера Сіліі не скончылася. У 2015‑м яна зноў стала дэпутатам Нацыянальнай асамблеі, а ў 2017 годзе была абраная ў Нацыянальную ўстаноўчую асамблею Венесуэлы, якая займалася распрацоўкай праекта новай канстытуцыі.
Абвінавачванні і скандалы
За вялікім уплывам цягнецца шлейф абвінавачванняў у кумаўстве. Калі Флорэс узначальвала парламент, апазіцыя і прафсаюзы заяўлялі, што яна працаўладкавала ў структуру дзясяткі сваіх сваякоў — ад братоў і сясцёр да пляменнікаў. У прэсе фігуравалі спісы з прозвішчамі каля 40 чалавек з яе сям'і, якія атрымалі пасады ў дзяржапараце.
Асаблівую ўвагу прыцягваюць яе сыны ад першага шлюбу, якіх у Венесуэле часта называюць «Los Chamos» («Хлопцы»). Хоць яны імкнуцца трымацца ў ценю, іх імёны стала фігуруюць у карупцыйных расследаваннях.
У 2019 годзе Міністэрства фінансаў ЗША ўвяло персанальныя санкцыі супраць усіх траіх сыноў Сіліі Флорэс, абвінаваціўшы іх у датычнасці да схем па крадзяжы сродкаў з дзяржаўных праграм.
Самы разбуральны скандал, звязаны з імем Флорэс, — гэта справа «наркапляменнікаў» (Narcosobrinos). У 2015 годзе два яе пляменнікі, аднаго з якіх яна пасля заўчаснай смерці сястры выхоўвала як уласнага сына, былі арыштаваныя на Гаіці пры спробе арганізаваць пастаўку 800 кілаграмаў какаіну ў ЗША. Мясцовая паліцыя перадала іх Упраўленню па барацьбе з наркотыкамі ЗША. Суд у Нью-Ёрку прызнаў мужчын вінаватымі і прысудзіў да доўгіх тэрмінаў зняволення.
Гэтая гісторыя нанесла каласальны ўдар па рэпутацыі прэзідэнцкай пары, паказаўшы магчымыя сувязі сям'і з міжнародным наркатрафікам, хоць сама Флорэс назвала гэта «імперыялістычным выкраданнем».
З-за абвінавачванняў у падрыве дэмакратыі і карупцыі Сілія Флорэс знаходзіцца пад персанальнымі санкцыямі ЗША, Канады, Панамы і шэрагу іншых краін. Злучаныя Штаты называюць яе ключавой фігурай, якая дапамагала Мадура ўтрымліваць аўтарытарны кантроль. 3 студзеня 2026 года ў ЗША быў апублікаваны федэральны абвінаваўчы акт, у якім Флорэс, Нікалас Мадура і яго сын абвінавачваюцца ў прамым супрацоўніцтве з наркагандлярамі.
Цяпер чытаюць
Адвакат Канавалава, расстралянага за тэракт у метро, упершыню расказаў, што адбывалася падчас следства29
Каментары