Паноў, ды не той. У расійскім пасольстве на Кіпры знайшлі мёртвым не таго чалавека, пра якога казалі раней
Як стала вядома рэсурсам «ВЧК ОГПУ» і Rucriminal.info, у пасольстве Расіі на Кіпры быў знойдзены мёртвым супрацоўнік Службы знешняй разведкі (СЗР) Антон Паноў, які працаваў крыптографам дыпламатычнай місіі. У той жа час трэці сакратар пасольства РФ Аляксей Паноў, якога «пахавалі» раней, прынамсі ўчора ўвечары быў жывы і здаровы.
Паводле звестак «ВЧК-ОГПУ», менавіта цела Антона Панова без прыкмет жыцця было знойдзена на тэрыторыі дыпмісіі. Супрацоўнікі пасольства не дапусцілі туды мясцовыя сілавыя структуры. Мяркуецца, што крыптограф мог скончыць жыццё самагубствам.
У савецкі час Паноў вучыўся ў школе пры групе савецкіх войскаў у Германіі, пасля — у ліцэі для адораных дзяцей з моцным фізіка-матэматычным ухілам. Далей у яго біяграфіі назіраюцца значныя прабелы, і зноў ён з’яўляецца, паводле ўцечак, ужо як супрацоўнік НТЦ «Атлас», які абслугоўвае спецслужбы і спецыялізуецца на распрацоўках у сферы камп’ютарнай бяспекі і крыптаграфіі. Наступным месцам працы стала МЗС Расіі. Аднак тыя ж уцечкі сведчаць пра цесную сувязь Панова з яго рэальным месцам службы — в/ч 33949, што адпавядае Службе знешняй разведкі.
Згодна з публікацыямі яго сваякоў у сацыяльных сетках, узімку 2025 года Антон Паноў адпачываў у Сочы на Краснай Паляне, летам быў з сям’ёй у Маскве, а ў «аксамітны сезон» ужо знаходзіўся на Кіпры. Новы год ён разам з жонкай Наталляй (паводле ўцечак, раней яна працавала ў гатэлі «Прэзідэнт») сустрэлі ў Нікасіі.
Паводле ўскосных звестак, Антон Паноў быў заўзятым гульняманам і пастаянна рабіў стаўкі на спартыўныя падзеі.
Каментары