У Мазамбіку памерла вядомая ва ўсім свеце жанчына, якую называлі «дзіцём-цудам»
У Мазамбіку пасля працяглай хваробы памерла 25‑гадовая Расіта Сальвадор Мабуянгу — жанчына, якую называлі «дзіцём-цудам», бо яна нарадзілася на дрэве падчас разбуральнай паводкі, піша Бі-бі-сі.
Расіта з’явілася на свет у 2000 годзе, калі на поўдні краіны рака Лімпапо выйшла з берагоў і выклікала самую маштабную паводку ў гісторыі Мазамбіка. Тады загінулі сотні людзей, а сотні тысяч засталіся без дамоў. Немаўля разам з маці было выратавана паўднёваафрыканскімі вайскоўцамі з дапамогай верталёта — гэтыя кадры абляцелі ўвесь свет і сталі сімвалам трагедыі.
Як паведамілі сваякі жанчыны, Расіта шмат гадоў пакутавала ад анеміі, а таксама хварэла на сухоты. З-за рэзкага пагаршэння свайго стану яна больш за два тыдні знаходзілася ў бальніцы, дзе і памерла 12 студзеня.
Маці дзяўчыны ўспамінала, што падчас паводкі сям’я некалькі дзён правяла на дрэве без ежы і дапамогі. Роды пачаліся проста там, над вадой, і родныя трымалі знізу тканіну, каб дзіця ў ваду не ўпала. Калі ратавальнікі знайшлі сям’ю, немаўля яшчэ было злучана з маці пупавінай.
Маці і дачка сталі сімваламі чалавечай стойкасці перад стыхіяй. Пазней яны нават наведалі ЗША, дзе расказвалі пра наступствы катастрофы і заклікалі да дапамогі Мазамбіку.
Расіта вырасла ў роднай мясцовасці, скончыла школу і пяць гадоў таму сама стала маці. Аднак, нягледзячы на абяцанні ўладаў, ёй так і не ўдалося атрымаць стыпендыю для навучання ва ўніверсітэце.
У афрыканскай дзяржаве Нігер знікла вялікая партыя ўрану. За гэтым могуць стаяць Іран ці Расія
У закінутай шахце ў Паўднёвай Афрыцы падчас блакады ўладамі загінулі 78 нелегальных рабочых
Разбуральны цыклон ударыў па французскім архіпелагу Маёта: імаверна, загінулі сотні людзей
Поўдзень Афрыкі ахапіў наймацнейшы за дзесяцігоддзі крызіс харчавання
Разведка ЗША: Беларусь стала перадавым вайсковым плацдармам Расіі24
Каментары